బిఎస్ఎన్ఎల్ పరిస్థితి 2013 లో ‘భారీ లాభాలు’ నుండి 2024 లో ‘భారీ నష్టాలు' కి మారలేదు

క్లైమ్ ఏంటి?

 ఇండియన్ యూత్ కాంగ్రెస్ జాతీయ సహ కార్యదర్శి రోష్నీ జైస్వాల్, భారతీయ సంచార్ నిగమ్ లిమిటెడ్ (బిఎస్ఎన్ఎల్) సంస్థ 2013 లో 10, 183 కోట్ల రూపాయలు లాభాలు ఆర్జించగా, 2023 లో 13, 356 కోట్ల నష్టాల్లో ఉందని ఎక్స్ (పూర్వపు ట్విట్టర్) లో రాసుకొచ్చారు.

జూలై 10 నాటి ఈ వైరల్ పోస్ట్ లో ఒక వీడియో కూడా ఉంది. అందులో ఇవే సంఖ్యలు చెబుతూ, 2013 నుండి జరిగిన మార్పులని గమనించమని ప్రేక్షకులకి చెబుతునట్టు ఉంది. అంటే దీనర్ధం 2013 లో యూపీఏ ప్రభుత్వం అధికారంలో ఉండగా పరిస్థితి అలా ఉందని, 2014 లో ఎన్డీఏ ప్రభుత్వం అధికారంలోకి వచ్చాక ఇలా మారింది అని అయ్యుండొచ్చు. ఈ పోస్ట్ ఆర్కైవ్ ఇక్కడ  చూడవచ్చు. ఇటువంటి ఇతర పోస్ట్స్ ఆర్కైవ్స్ ఇక్కడ  మరియు ఇక్కడ చూడవచ్చు.  

సామాజిక మాధ్యమ పోస్ట్స్ స్క్రీన్ షాట్స్ (సౌజన్యం: ఎక్స్/లాజికల్లీ ఫ్యాక్ట్స్ ఎడిటింగ్)

అయితే ఈ అంకెలు తప్పని మా పరిశోధన లో తేలింది. బిఎస్ఎన్ఎల్ 2013-14, 2023-24 లలో నికర నష్టాల్లోనే ఉంది. భారతదేశం లో ఆర్థిక సంవత్సరం ఏప్రిల్ 1 నుండి తదుపరి సంవత్సరం మార్చ్ 31 వరకు నడుస్తుంది.

2013 నాటి డేటా ఏమి చెబుతుంది?

రోష్నీ చెప్పిన “2013” సంవత్సరం అంటే 2013-14 అని మేము భావించాము. ఈ సంవత్సరపు వార్షిక ఆర్థిక నివేదిక ని బిఎస్ఎన్ఎల్ వెబ్సైట్ లో సంపాదించాము. ఆ సంవత్సరం 7019.76 కోట్ల నికర నష్టం వచ్చిందని ఈ నివేదిక లో ఉంది. ఇంతక ముందుపు సంవత్సరాలలో కూడా ఈ సంస్థ నష్టాలలోనే ఉందని ఈ నివేదిక లో ఉంది.

బిఎస్ఎన్ఎల్ 2012-13, 2013-14 నాటి లాభ నష్టాల పట్టిక (సౌజన్యం: బిఎస్ఎన్ఎల్)

2024 డేటా సంగతి ఏంటి?

అలాగే, సంస్థ 2024 నాటి అంకెలు కూడా క్లైమ్ తప్పు అని తెలియచేస్తున్నాయి. ఈ సంవత్సరం ఆర్థిక నివేదిక ప్రకారం బిఎస్ఎన్ఎల్ 2023-24 లో 5367.45 కోట్ల నష్టం చవిచూసింది. ఈ నివేదిక లో పేజీ సంఖ్య 46 లో ఈ వివరాలు ఉన్నాయి. 

బిఎస్ఎన్ఎల్ 2023 -24 నాటి లాభ నష్టాల పట్టిక (సౌజన్యం: బిఎస్ఎన్ఎల్)

2022-23 లో 8161.41 కోట్ల నష్టం వచ్చింది అని ఈ నివేదిక లో ఉంది. అంటే, 2023-24 నాటికి నికర నష్టం తగ్గింది అంతే. 

ఇవే వివరాలు వార్తా కథానాలలో కూడా ఉన్నాయి. ఈ కథనాల ప్రకారం, 2013-14లో సంస్థకి 7020 కోట్ల నష్టం, 2023-24లో 5367 కోట్ల నష్టం వచ్చింది. 

తీర్పు

సామాజిక మాధ్యమ పోస్ట్ లో చెప్పిన అంకెలు బిఎస్ఎన్ఎల్ వార్షిక ఆర్థిక నివేదిక లోని అంకెలతో సరితూగలేదు. ఈ రెండు సంవత్సరాలు బిఎస్ఎన్ఎల్ నష్టాలే చవిచూసింది. 

(అనువాదం - గుత్తా రోహిత్)