বিএছএনএলৰ ২০১৩ত ‘বিপুল লাভ’ তথা ২০২৪ত ‘বৃহৎ লোকচান’ হোৱা নাই

কি দাবী কৰা হৈছে?

ভাৰতীয় যুৱ কংগ্ৰেছৰ ৰাষ্ট্ৰীয় যুটীয়া সম্পাদক ৰোশ্নি জয়ছোৱালে এটা এক্স (পূৰ্বৰ টুইটাৰ)ত পোষ্টত দাবী কৰিছে যে ভাৰতৰ চৰকাৰী মালিকানাধীন টেলিকমিউনিকেচন প্ৰদানকাৰী ভাৰত সঞ্চাৰ নিগম লিমিটেডে (বিএছএনএল)  ২০১৩ চনত ১০,১৮৩ কোটি (ভাৰতীয় টকা) টকাৰ লাভ কৰিছিল যি ২০২৪ত ১৩,৩৫৬ কোটি টকাৰ লোকচানলৈ পৰিণত হৈছে।

১০ জুলাইৰ ভাইৰেল পোষ্টটোত জয়ছোৱালে এই পৰিসংখ্যাৰ পুনৰাবৃত্তি কৰি ২০১৩ চনৰ পৰা ২০২৪ লৈকে উক্ত পৰিৱৰ্তনৰ কথা বিবেচনা কৰিবলৈ দৰ্শকক উৎসাহ জনোৱা এক ভিডিঅ’ সন্নিবিষ্ট কৰা হৈছে। এইয়া ২০১৩ চনত ক্ষমতাত থকা ইউনাইটেড প্ৰগ্ৰেছিভ এলায়েন্স (ইউপিএ)ৰ পৰা ২০১৪ত শাসনত অহা নেশ্যনেল ডেম’ক্ৰেটিক এলায়েন্স (এনডিএ)লৈ পৰিৱৰ্তন হোৱাৰ এক ইংগিত হব পাৰে। পোষ্টটোৰ এটা আৰ্কাইভ কৰা লিংক ইয়াত উপলব্ধ। আন আন পোষ্টতো একেধৰণৰ দাবী কৰা হৈছে, যাৰ উদাহৰণ ইয়াত আৰু ইয়াত আৰ্কাইভ কৰা হৈছে।

২০১৩ চনত বিএছএনএলে বিপুল লাভ আৰু ২০২৩ চনত বৃহৎ লোকচান সম্মুখীন কৰা বুলি ভুৱা পৰিসংখ্যা শ্বেয়াৰ কৰা পোষ্টৰ স্ক্ৰীণশ্বট। (উৎস: এক্স/লজিকেলী ফেক্টছৰ দ্বাৰা পৰিৱৰ্তিত)

আমাৰ তদন্তত অৱশ্যে এই সংখ্যাবোৰ মিছা বুলি প্ৰকাশ পাইছে। বিএছএনএলে (বিত্তীয় বৰ্ষ) ২০১৩-১৪ আৰু ২০২৩-২৪ বিত্তীয় বৰ্ষত সামগ্ৰিক নেট লোকচানৰ ৰিপৰ্ট দিছে। ভাৰতত এটা বিত্তীয় বৰ্ষ ১ এপ্ৰিলৰ পৰা পিছৰ বছৰৰ ৩১ মাৰ্চলৈ হয়।

২০১৩ চনৰ তথ্যই কি দেখুৱাইছে?

জয়ছোৱালে ২০১৩-১৪ বিত্তীয় বৰ্ষক "২০১৩" বুলি উল্লেখ কৰা বুলি ধৰি আমি সেই বিত্তীয় বৰ্ষৰ বাবে বিএছএনএলৰ ৱেবছাইটত আপলোড কৰা বিত্তীয় প্ৰতিবেদন পৰীক্ষা কৰিলোঁ। প্ৰতিবেদনত সেই বছৰৰ বাবে নেট ৭,০১৯.৭৬ কোটি টকা লোকচানৰ ইংগিত দিয়া হৈছে। কোম্পানীটোৱে বিগত বছৰবোৰতো লোকচান ভুগিছিল, যিটোৱে ১০ হাজাৰ কোটি টকাতকৈ অধিক লাভৰ দাবীৰ খণ্ডন কৰিছে। 

২০১২-১৩ আৰু ২০১৩-১৪ বিত্তীয় বৰ্ষৰ বিএছএনএলৰ লাভ আৰু লোকচানৰ বিৱৰণীৰ স্ক্ৰীণশ্বট। (উৎস: বিএছএনএল/লজিকেলী ফেক্টছৰ দ্বাৰা পৰিৱৰ্তিত)

একেখন নথিতে দেখা গৈছে যে বিএছএনএলৰ নেট লোকচান ২০১৩ চনৰ ৩১ মাৰ্চৰ বিত্তীয় বৰ্ষৰ সমাপ্তত ৭,৮৮৪.৪৪ কোটি টকা হৈছিল । 

২০২৪ চনৰ তথ্যত কি আছে?

তদুপৰি বিএছএনএলৰ ২০২৪ চনৰ বিত্তীয় প্ৰতিবেদনৰ তথ্যৰ এই দাবীৰ সৈতে মিল নাই। এই প্ৰতিবেদন অনুসৰি কোম্পানীটোৱে ২০২৩-২৪ বিত্তীয় বৰ্ষত ৫,৩৬৭.৪৫ কোটি টকা নেট লোকচান কৰিছে, পোষ্টটোত উল্লেখ কৰাৰ দৰে ১৩ হাজাৰ কোটি টকাৰ ওপৰত লোকচান নাই কৰা। এই তথ্য প্ৰতিবেদনৰ ৪৬ নং পৃষ্ঠাত পৰীক্ষা কৰিব পাৰি।

বিত্তীয় বৰ্ষৰ বাবে কৰ দিয়াৰ পিছত লোকচান উল্লেখ কৰি ২০২৩-২০২৪ বিত্তীয় বৰ্ষৰ বিএছএনএলৰ বিত্তীয় প্ৰতিবেদনৰ স্ক্ৰীণশ্বট। (উৎস: বিএছএনএল/লজিকেলী ফেক্টছৰ দ্বাৰা পৰিৱৰ্তিত)

২০২২-২৩ বিত্তীয় বৰ্ষৰ তথ্য পৰীক্ষা কৰি ৮,১৬১.৪১ কোটি টকাৰ অধিক নেট লোকচান পোৱা গ’ল। ইয়াৰ দ্বাৰা ২০২৩-২৪ বিত্তীয় বৰ্ষৰ নেট লোকচান হ্ৰাস পোৱাৰ ইংগিত পোৱা গৈছে।

এই পৰিসংখ্যা দুয়োটা বছৰৰ বাতৰিয়েও নিশ্চিত কৰিছে, য’ত একেধৰণৰ সংখ্যা উল্লেখ কৰা হৈছে। এই প্ৰতিবেদনসমূহে ইংগিত দিয়ে যে বিএছএনএলৰ ২০১৩-১৪ বিত্তীয় বৰ্ষত ৭,০২০ কোটি টকা আৰু ২০২৩-২৪ বিত্তীয় বৰ্ষত ৫,৩৬৭ কোটি টকা লোকচান হৈছে । 

সিদ্ধান্ত

ছ’চিয়েল মিডিয়া পোষ্টত উল্লেখ কৰা সংখ্যা বিএছএনএলে প্ৰকাশ কৰা বিত্তীয় বিৱৰণীৰ সৈতে মিল নাই। কোম্পানীটোৱে দুয়োটা বছৰতে নেট লোকচানৰ ৰিপৰ্ট দিছিল যি ২০১৩ চনৰ পৰা ২০২৩ চনলৈ বিএছএনএলে লাভৰ পৰা লোকচানলৈ গতি কৰিছিল বুলি কৰা দাবীক খণ্ডন কৰিছে।