ಇಲ್ಲ, ವಕ್ಫ್ ಬೋರ್ಡ್ ಮುಂಬೈನ ಸಿದ್ಧಿವಿನಾಯಕ ದೇವಸ್ಥಾನದ ಮೇಲೆ ಹಕ್ಕು ಸಾಧಿಸಿಲ್ಲ

ಹೇಳಿಕೆ ಏನು?

ಹಲವಾರು ಸಾಮಾಜಿಕ ಮಾಧ್ಯಮ ಬಳಕೆದಾರರು ಎರಡು ಚಿತ್ರಗಳ ಕೊಲಾಜ್ ಅನ್ನು ಹಂಚಿಕೊಂಡಿದ್ದಾರೆ: ಒಂದು ಮುಂಬೈನ ಶ್ರೀ ಸಿದ್ಧಿವಿನಾಯಕ ದೇವಸ್ಥಾನವನ್ನು ತೋರಿಸುತ್ತದೆ ಮತ್ತು ಇನ್ನೊಂದು ದೇವಸ್ಥಾನದೊಳಗಿರುವ ಹಿಂದೂ ದೇವರು ಗಣೇಶನ ವಿಗ್ರಹವನ್ನು ತೋರಿಸುತ್ತದೆ. ವಕ್ಫ್ ಬೋರ್ಡ್ ದೇವಾಲಯದ ಮೇಲೆ ಹಕ್ಕು ಸಾಧಿಸಿದೆ ಎಂದು ಪೋಷ್ಟ್ ಗಳು ಹೇಳುತ್ತವೆ. 

ವೈರಲ್ ಕೊಲಾಜ್ ಚಿತ್ರಣವು ಮರಾಠಿ ಭಾಷೆಯ ದಿನಪತ್ರಿಕೆಯಾದ ಸಕಲ್‌ನ ಲೋಗೋವನ್ನು ಮೇಲಿನ ಬಲ ಮೂಲೆಯಲ್ಲಿ ಪ್ರದರ್ಶಿಸುತ್ತದೆ, ಪೋಷ್ಟ್ ಪತ್ರಿಕೆಯಿಂದ ಹುಟ್ಟಿಕೊಂಡಿದೆ ಎಂಬ ಅನಿಸಿಕೆ ನೀಡುತ್ತದೆ.

ಎಕ್ಸ್ ನಲ್ಲಿ ಒಬ್ಬ ಬಳಕೆದಾರರು ಈ ಹೇಳಿಕೆಯನ್ನು ಹಂಚಿಕೊಂಡಿದ್ದು ಅದರ ಅನುವವಾದ ಹೀಗಿದೆ: "ತುಂಬಾ ಕೋಪೋದ್ರಿಕ್ತವಾಗಿದೆ! ಹಿಂದೂಗಳ ಆರಾಧ್ಯ ಮತ್ತು ಮುಂಬೈನ ಗುರುತಾಗಿರುವ ಸಿದ್ಧಿವಿನಾಯಕ ದೇವಾಲಯದ ಮೇಲೆ ವಕ್ಫ್ ಮಂಡಳಿಯು ಹಕ್ಕು ಸಾಧಿಸಿದೆ! ಮಹಾವಿಕಾಸ್ ಅಘಾಡಿಯು ಲಿಖಿತ ಒಪ್ಪಿಗೆಯನ್ನು ನೀಡಿದೆ. ಉಲೇಮಾ, ವಕ್ಫ್ ಬೇಡಿಕೆ ಸೇರಿದಂತೆ, ನೀವು ದೇವಾಲಯಗಳು ಮತ್ತು ಕೋಟೆಗಳನ್ನು ಉಳಿಸಲು ಬಯಸಿದರೆ, ಮಹಾಯುತಿಗೆ ಮತ ನೀಡಿ!"

ಮಹಾಯುತಿ (ಗ್ರ್ಯಾಂಡ್ ಅಲೈಯನ್ಸ್ ಎಂದು ಅನುವಾದಿಸಲಾಗಿದೆ) ಭಾರತದ ಮಹಾರಾಷ್ಟ್ರದ ರಾಜಕೀಯ ಒಕ್ಕೂಟವಾಗಿದೆ. ಮೈತ್ರಿಯು ಪ್ರಸ್ತುತ ಮೂರು ಪ್ರಮುಖ ಪಕ್ಷಗಳನ್ನು ಒಳಗೊಂಡಿದೆ: ಬಿಜೆಪಿ, ಶಿವಸೇನೆ (ಎಸ್ ಹೆಚ್ಎಸ್), ಮತ್ತು ರಾಷ್ಟ್ರೀಯವಾದಿ ಕಾಂಗ್ರೆಸ್ ಪಕ್ಷ (ಎನ್ ಸಿಪಿ).

ಈ ಪೋಷ್ಟ್, ನವೆಂಬರ್ ೧೮, ೨೦೨೪ ರಂದು, ೪೦,೦೦೦ ವೀಕ್ಷಣೆಗಳನ್ನು ಗಳಿಸಿದೆ. ಇದರ ಆರ್ಕೈವ್ ಮಾಡಿದ ಆವೃತ್ತಿಗಳು ಮತ್ತು ಭಾರತೀಯ ಜನತಾ ಪಕ್ಷದ (ಬಿಜೆಪಿ) ಶಾಸಕ ನಿತೇಶ್ ರಾಣೆ ಸೇರಿದಂತೆ ಉದ್ದೇಶಿತ ಸಕಲ್ ಸುದ್ದಿ ಗ್ರಾಫಿಕ್ ಅನ್ನು ಹೊಂದಿರುವ ಇದೇ ರೀತಿಯ ಪೋಷ್ಟ್ ಗಳನ್ನು ಇಲ್ಲಿ, ಇಲ್ಲಿ, ಇಲ್ಲಿ ಮತ್ತು ಇಲ್ಲಿ ಕಾಣಬಹುದು.

ಕನ್ನಡದ್ಲಲಿ ಹಂಚಿಕೊಂಡ ಪೋಷ್ಟ್ ಒಂದರ ಶೀರ್ಷಿಕೆ ಹೀಗಿದೆ, "ಸಿದ್ದಿ ವಿನಾಯಕ ದೇವಸ್ಥಾನ ಅಲ್ಲಾಹು ಅಕ್ಬರನದ್ದು," ಮತ್ತು ಅದು ಗಣೇಶನ ಚಿತ್ರ ಹಾಗು ಅದರ ಮೇಲೆ ಆಂಗ್ಲ ಭಾಷೆಯಲ್ಲಿ ಬರೆದ ವಾಕ್ಯ ಹೀಗೆ ಅನುವಾದಿಸುತ್ತದೆ, "ವಕ್ಫ್ ಬೋರ್ಡ್ ಈಗ ಮುಂಬೈನ ಸಿದ್ದಿ ವಿನಾಯಕ ದೇವಸ್ಥಾನದ ಮೇಲೆ ಹಕ್ಕು ಸಾಧಿಸಿದೆ."

ವಕ್ಫ್ ಬೋರ್ಡ್ ಭಾರತದಲ್ಲಿನ ಶಾಸನಬದ್ಧ ಸಂಸ್ಥೆಯಾಗಿದ್ದು ಅದು ವಕ್ಫ್ ಆಸ್ತಿಗಳನ್ನು ನಿರ್ವಹಿಸುತ್ತದೆ, ಇದು ಮುಸ್ಲಿಮರು ಧಾರ್ಮಿಕ, ಶೈಕ್ಷಣಿಕ ಅಥವಾ ಸಮುದಾಯ ಉದ್ದೇಶಗಳಿಗಾಗಿ ಮಾಡಿದ ದತ್ತಿಗಳಾಗಿವೆ.

ಸಾಮಾಜಿಕ ಮಾಧ್ಯಮದಲ್ಲಿ ಕಂಡ ವೈರಲ್ ಪೋಷ್ಟ್ ಗಳ ಸ್ಕ್ರೀನ್‌ಶಾಟ್‌ಗಳು. 
(ಮೂಲ: ಎಕ್ಸ್/ಲಾಜಿಕಲಿ ಫ್ಯಾಕ್ಟ್ಸ್‌ನಿಂದ ಮಾರ್ಪಡಿಸಲಾಗಿದೆ)

ವಕ್ಫ್ ಬೋರ್ಡ್ ಮತ್ತು ಸಿದ್ಧಿವಿನಾಯಕ ದೇವಸ್ಥಾನ ಹೇಳಿದ್ದೇನು?

ಲಾಜಿಕಲಿ ಫ್ಯಾಕ್ಟ್ಸ್ ಸ್ಪಷ್ಟೀಕರಣಕ್ಕಾಗಿ ಮಹಾರಾಷ್ಟ್ರ ವಕ್ಫ್ ಮಂಡಳಿಯನ್ನು ಸಂಪರ್ಕಿಸಿದೆ. ಮಹಾರಾಷ್ಟ್ರ ವಕ್ಫ್ ಮಂಡಳಿಯ ಸಿಇಒ ಜುನೈದ್ ಸೈಯದ್ ನಮಗೆ ಹೇಳಿದರು: "ಇದು ನಕಲಿ ಸುದ್ದಿ. ಅಂತಹ ಯಾವುದೇ ಸಂವಹನವಿಲ್ಲ ಅಥವಾ ಮಂಡಳಿಯು ಅಂತಹ ಯಾವುದೇ ಹೇಳಿಕೆ ನೀಡಿಲ್ಲ."

ಶ್ರೀ ಸಿದ್ಧಿವಿನಾಯಕ ಮಂದಿರ ಟ್ರಸ್ಟ್‌ನ ಖಜಾಂಚಿ ಪವನ್ ಕುಮಾರ್ ತ್ರಿಪಾಠಿ ಅವರ ವೀಡಿಯೋ ಸಾಮಾಜಿಕ ಮಾಧ್ಯಮದಲ್ಲಿ ವ್ಯಾಪಕವಾಗಿ ಹಂಚಿಕೊಳ್ಳಲಾಗಿದೆ, ಅಲ್ಲಿ ಅವರು ದೇವಾಲಯವು ಮುಂಬೈನ ಹೆಮ್ಮೆಯ ಸಂಕೇತವಾಗಿದೆ ಮತ್ತು ಯಾವುದೇ ಮಂಡಳಿಯು ಅದರ ಮೇಲೆ ಹಕ್ಕು ಸಾಧಿಸಲು ಸಾಧ್ಯವಿಲ್ಲ ಎಂದು ಹೇಳುವುದನ್ನು ಕೇಳಬಹುದು. ಈ ದೇವಾಲಯವು ಯಾವಾಗಲೂ ಗಣೇಶನ ಭಕ್ತರಿಗೆ ಸೇರಿದ್ದು, ಹಾಗೆಯೇ ಮುಂದುವರಿಯುತ್ತದೆ ಎಂದು ಅವರು ಹೇಳಿದರು.

ಹೆಚ್ಚಿನ ಕಾಮೆಂಟ್‌ಗಾಗಿ ಲಾಜಿಕಲಿ ಫ್ಯಾಕ್ಟ್ಸ್ ತ್ರಿಪಾಠಿಯನ್ನು ಸಂಪರ್ಕಿಸಿದೆ. ವೀಡಿಯೋ ನಿಜವಾಗಿದೆ ಎಂದು ಅವರು ದೃಢಪಡಿಸಿದರು ಮತ್ತು ದೇವಸ್ಥಾನವು ವಕ್ಫ್ ಬೋರ್ಡ್‌ನಿಂದ ಯಾವುದೇ ಸಂವಹನವನ್ನು ಸ್ವೀಕರಿಸಿಲ್ಲ ಮತ್ತು ಅವರಿಂದ ಅಂತಹ ಯಾವುದೇ ಹೇಳಿಕೆಗಳನ್ನು ನೋಡಿಲ್ಲ ಎಂದು ಹೇಳಿದರು.

ತೀರ್ಪು

ಶ್ರೀ ಸಿದ್ಧಿವಿನಾಯಕ ದೇವಸ್ಥಾನದ ಮೇಲೆ ಅಂತಹ ಯಾವುದೇ ಹಕ್ಕು ಮಾಡಲಾಗಿಲ್ಲ ಎಂದು ದೇವಾಲಯದ ಅಧಿಕಾರಿಗಳು ಮತ್ತು ಮಹಾರಾಷ್ಟ್ರ ವಕ್ಫ್ ಮಂಡಳಿ ಇಬ್ಬರೂ ಲಾಜಿಕಲಿ ಫ್ಯಾಕ್ಟ್ಸ್ ಗೆ ದೃಢಪಡಿಸಿದ್ದಾರೆ. ಸುದ್ದಿ ಸಂಸ್ಥೆಯ ಲೋಗೋವನ್ನು ಹೊಂದಿರುವ ವೈರಲ್ ಸಾಮಾಜಿಕ ಮಾಧ್ಯಮ ಗ್ರಾಫಿಕ್ ಫೇಕ್ ಎಂದು ಸಕಲ್ ಮೀಡಿಯಾ ಸಾರ್ವಜನಿಕ ಹೇಳಿಕೆಗಳಲ್ಲಿ ಸ್ಪಷ್ಟಪಡಿಸಿದೆ.

(ಅನುವಾದಿಸಿದವರು: ಅಂಕಿತಾ ಕುಲಕರ್ಣಿ)

Read this fact-check in English here