೨೦೨೧ ರಲ್ಲಿ ದೆಹಲಿ ಬಳಿ ಕಂಡ ಬ್ಯಾರಿಕೇಡ್‌ಗಳ ಚಿತ್ರವನ್ನು ಇತ್ತೀಚಿನ ರೈತರ ಪ್ರತಿಭಟನೆಗೆ ಲಿಂಕ್ ಮಾಡಲಾಗಿದೆ

ಉತ್ತರ ಭಾರತದ ರಾಜ್ಯಗಳಾದ ಪಂಜಾಬ್, ಹರಿಯಾಣ ಮತ್ತು ಉತ್ತರ ಪ್ರದೇಶದ ರೈತರು ಫೆಬ್ರವರಿ ೧೩ ರಂದು ರಾಷ್ಟ್ರ ರಾಜಧಾನಿಗೆ ಹೋಗುವ ಪ್ರವೇಶ ದಾರಿಗಳಲ್ಲಿ ಭಾರೀ ಬ್ಯಾರಿಕೇಡ್‌ಗಳ ನಡುವೆ ನವದೆಹಲಿಯ ಕಡೆಗೆ ಮೆರವಣಿಗೆ ನಡೆಸಿದರು. ಸಂಯುಕ್ತ ಕಿಸಾನ್ ಮೋರ್ಚಾ (ರಾಜಕೀಯೇತರ) ಮತ್ತು ಕಿಸಾನ್ ಮಜ್ದೂರ್ ಮೋರ್ಚಾದ ಅಡಿಯಲ್ಲಿ ಒಗ್ಗೂಡಿದ ರೈತರಲ್ಲಿ ಅಸಮಾಧಾನವು ವಾರಗಳಿಂದ ಹುಟ್ಟಿಕೊಂಡಿದೆ ಮತ್ತು ಸರ್ಕಾರದೊಂದಿಗಿನ ಮಾತುಕತೆಗಳು ಕುಸಿದಿವೆ.

ಹೇಳಿಕೆ ಏನು?

ಈ ಹಿನ್ನೆಲೆಯಲ್ಲಿ ಸಾಮಾಜಿಕ ಜಾಲತಾಣಗಳಲ್ಲಿ ಹಲವು ಹಳೆಯ ಮತ್ತು ಸಂಬಂಧವಿಲ್ಲದ ದೃಶ್ಯಗಳು ನಡೆಯುತ್ತಿರುವ ರೈತರ ಆಂದೋಲನಕ್ಕೆ ಸಂಬಂಧಿಸಿ ವ್ಯಾಪಕವಾಗಿ ಹರಿದಾಡುತ್ತಿವೆ. ಎಕ್ಸ್ (ಹಿಂದೆ ಟ್ವಿಟರ್) ಬಳಕೆದಾರರು ಹಲವಾರು ಹಂತದ ಬ್ಯಾರಿಕೇಡಿಂಗ್ ಮತ್ತು ಭದ್ರತಾ ಪಡೆಗಳ ಗಮನಾರ್ಹ ಉಪಸ್ಥಿತಿಯೊಂದಿಗೆ ಹೆದ್ದಾರಿಯ ಚಿತ್ರವನ್ನು ಹಂಚಿಕೊಂಡಿದ್ದಾರೆ. ನಡೆಯುತ್ತಿರುವ ರೈತರ ಪ್ರತಿಭಟನೆಗೆ ಮುಂಚಿತವಾಗಿ ಚಿತ್ರ ತೆಗೆಯಲಾಗಿದೆ ಮತ್ತು ರೈತರು ದೆಹಲಿಗೆ ಪ್ರವೇಶಿಸುವುದನ್ನು ತಡೆಯಲು ಬ್ಯಾರಿಕೇಡ್‌ಗಳನ್ನು ಸ್ಥಾಪಿಸಲಾಗಿದೆ ಎಂದು ಬಳಕೆದಾರರು ಸೂಚಿಸಿದ್ದಾರೆ. ಹಲವಾರು ಇತರ ಬಳಕೆದಾರರು ವೈರಲ್ ಹ್ಯಾಶ್‌ಟ್ಯಾಗ್‌ಗಳೊಂದಿಗೆ ಚಿತ್ರವನ್ನು ಹಂಚಿಕೊಂಡಿದ್ದಾರೆ "#FarmersProtest2024" ಮತ್ತು "#FarmersProtest." ಅಂತಹ ಪೋಷ್ಟ್ ಗಳ ಆರ್ಕೈವ್ ಮಾಡಿದ ಆವೃತ್ತಿಗಳನ್ನು ಇಲ್ಲಿ ಮತ್ತು ಇಲ್ಲಿ ಕಾಣಬಹುದು. 

ಆನ್‌ಲೈನ್‌ನಲ್ಲಿ ಮಾಡಿದ ಹೇಳಿಕೆಗಳ ಸ್ಕ್ರೀನ್‌ಶಾಟ್. (ಮೂಲ: ಎಕ್ಸ್/ಲಾಜಿಕಲಿ ಫ್ಯಾಕ್ಟ್ಸ್ ನಿಂದ ಮಾರ್ಪಡಿಸಲಾಗಿದೆ)

ರೈತರು ದೆಹಲಿಗೆ ತಲುಪುವುದನ್ನು ತಡೆಯುವ ಉದ್ದೇಶದಿಂದ ಸಿಂಘು, ಘಾಜಿಪುರ ಮತ್ತು ಟಿಕ್ರಿ ಗಡಿಗಳಲ್ಲಿ ಪೊಲೀಸರು ಕಬ್ಬಿಣದ ಮೊಳೆಗಳು, ಮುಳ್ಳುತಂತಿಗಳು ಮತ್ತು ಕಾಂಕ್ರೀಟ್ ತಡೆಗಳನ್ನು ಹಾಕಿದ್ದಾರೆ ಎಂದು ಸುದ್ದಿವಾಹಿನಿಗಳು ವರದಿ ಮಾಡಿವೆ, ಆದರೆ ವೈರಲ್ ಚಿತ್ರವು ಇತ್ತೀಚಿನದಲ್ಲ. ೨೦೨೧ ರಲ್ಲಿ ರೈತರು ಹೊಸದಾಗಿ ಅಂಗೀಕರಿಸಿದ ಮೂರು ಕೃಷಿ ಕಾನೂನುಗಳ ವಿರುದ್ಧ ಚಳುವಳಿಯನ್ನು ಪ್ರಾರಂಭಿಸಿದಾಗ (ಈಗ ರದ್ದುಗೊಳಿಸಲಾಗಿದೆ) ದೆಹಲಿ ಗಡಿಯಲ್ಲಿ ಭಾರೀ ಬ್ಯಾರಿಕೇಡಿಂಗ್ ಅನ್ನು ಇದು ತೋರಿಸುತ್ತದೆ.

ನಾವು ಏನು ಕಂಡುಕೊಂಡಿದ್ದೇವೆ?

ಗೂಗಲ್ ನಲ್ಲಿ ಗೂಗಲ್ ರಿವರ್ಸ್ ಇಮೇಜ್ ಸರ್ಚ್ ಮೂಲಕ, ನಾವು ವೈರಲ್ ಚಿತ್ರವನ್ನು ೨೦೨೧ ರದ್ದು ಎಂದು ಪತ್ತೆಹಚ್ಚಿದ್ದೇವೆ. 

ಗೆಟ್ಟಿ ಇಮೇಜಸ್ ಫೆಬ್ರವರಿ ೨೦೨೧ ರಲ್ಲಿ ಉತ್ತಮ ಗುಣಮಟ್ಟದಲ್ಲಿ ಅದೇ ಚಿತ್ರವನ್ನು ಹಂಚಿಕೊಂಡಿದೆ. "ಗಾಜಿಪುರ ಗಡಿಯಲ್ಲಿ ರೈತ ಪ್ರತಿಭಟನೆಯ ಸಮೀಪದಲ್ಲಿ ಬಹು-ಹಂತದ ಬ್ಯಾರಿಕೇಡಿಂಗ್" ಎಂಬ ಶೀರ್ಷಿಕೆಯ ಚಿತ್ರವನ್ನು ಘಾಜಿಪುರ ಗಡಿಯಲ್ಲಿ ಬ್ಯಾರಿಕೇಡ್‌ಗಳನ್ನು ಸ್ಥಾಪಿಸಲಾಗಿದೆ ಎಂದು ವಿವರಿಸುವ ವಿವರಣೆಯೊಂದಿಗೆ ಹಂಚಿಕೊಳ್ಳಲಾಗಿದೆ. ರೈತರ ಪ್ರತಿಭಟನೆಯು ಫೆಬ್ರವರಿ ೩, ೨೦೨೧ ರಂದು ಭಾರತದ ನವದೆಹಲಿಯಲ್ಲಿ ಮೂರು ಕೃಷಿ ಕಾನೂನುಗಳ ವಿರುದ್ಧ ಮುಂದುವರೆಯಿತು. ಗೆಟ್ಟಿ ಇಮೇಜಸ್‌ಗೆ ಕೊಡುಗೆ ನೀಡಿರುವ ಹಿಂದೂಸ್ತಾನ್ ಟೈಮ್ಸ್‌ನ ಸಾಕಿಬ್ ಅಲಿಗೆ ಕ್ರೆಡಿಟ್ ನೀಡಲಾಗಿದೆ. 

ಇದೇ ಚಿತ್ರವನ್ನು ಫೆಬ್ರವರಿ ೪, ೨೦೨೧ ರಂದು ಇಂಡಿಯಾ ಟುಡೇ ಪ್ರಕಟಿಸಿದೆ ಮತ್ತು ಸುದ್ದಿ ಸಂಸ್ಥೆ ಪ್ರೆಸ್ ಟ್ರಸ್ಟ್ ಆಫ್ ಇಂಡಿಯಾ (ಪಿಟಿಐ) ಗೆ ಕ್ರೆಡಿಟ್ ನೀಡಲಾಗಿದೆ. ಅನೇಕ ಸುದ್ದಿವಾಹಿನಿಗಳು ಘಟನೆಯ ಕುರಿತು ವರದಿ ಮಾಡಿದ್ದವು ಮತ್ತು ವಿವಿಧ ಕೋನಗಳಿಂದ ಸೆರೆಹಿಡಿಯಲಾದ ಈ ಬ್ಲಾಕ್‌ಡೆಗಳ ಚಿತ್ರಗಳನ್ನು ಹೊಂದಿದ್ದವು.

ವೈರಲ್ ಚಿತ್ರವನ್ನು ಹೊಂದಿರುವ ೨೦೨೧ ರಿಂದ ಇಂಡಿಯಾ ಟುಡೇ ವರದಿಯ ಸ್ಕ್ರೀನ್‌ಶಾಟ್. (ಮೂಲ: ಇಂಡಿಯಾ ಟುಡೇ)

ಸೆಪ್ಟೆಂಬರ್ ೨೦೨೦ ರಲ್ಲಿ, ಭಾರತ ಸರ್ಕಾರವು ಮೂರು ಕಾನೂನುಗಳನ್ನು ಅಂಗೀಕರಿಸಿತು, ಇದನ್ನು ರೈತ ಸಂಘಗಳು ರೈತ ವಿರೋಧಿ ಎಂದು ಟೀಕಿಸಿದವು ಮತ್ತು ಕೃಷಿ ಕ್ಷೇತ್ರದ ಖಾಸಗೀಕರಣದ ಹೆಬ್ಬಾಗಿಲು ಎಂದು ಪರಿಗಣಿಸಲಾಗಿದೆ. ೨೦೨೦ ರ ಅಂತ್ಯದಿಂದ ನವೆಂಬರ್ ೨೦೨೧ ರವರೆಗೆ ಸುಮಾರು ಒಂದು ವರ್ಷದವರೆಗೆ, ವಿಶೇಷವಾಗಿ ದೆಹಲಿ ಗಡಿಗಳಲ್ಲಿ ರಾಷ್ಟ್ರವ್ಯಾಪಿ ಪ್ರತಿಭಟನೆಗಳಲ್ಲಿ ರೈತರಿಂದ ಉಂಟಾದ ಕಳವಳಗಳು ಹಿಮಪಾತವಾಯಿತು. ಇತ್ಯರ್ಥವಾಗದ ರೈತರ ಕುಂದುಕೊರತೆಗಳನ್ನು ಉಲ್ಲೇಖಿಸಿ ಪ್ರಧಾನಿ ನರೇಂದ್ರ ಮೋದಿ ಅವರು ಎಲ್ಲಾ ಮೂರು ಕಾನೂನುಗಳನ್ನು ರದ್ದುಗೊಳಿಸುವುದಾಗಿ ಘೋಷಿಸಿದಾಗ ಪ್ರತಿಭಟನೆಯನ್ನು ಹಿಂತೆಗೆದುಕೊಳ್ಳಲಾಯಿತು.

ಫೆಬ್ರವರಿ ೨೦೨೪ ರ ಪ್ರತಿಭಟನೆಗಳನ್ನು "ರೈತ ಪ್ರತಿಭಟನೆಗಳು ೨.೦" ಎಂದು ಕರೆಯಲಾಗಿದ್ದು, ೨೦೨೧ ರಲ್ಲಿ ಸರ್ಕಾರವು ಭರವಸೆ ನೀಡಿದಂತೆ ಕನಿಷ್ಠ ಬೆಂಬಲ ಬೆಲೆಯನ್ನು (ಎಂಎಸ್‌ಪಿ) ಖಾತರಿಪಡಿಸುವ ಕಾನೂನನ್ನು ಜಾರಿಗೆ ತರಲು ಒತ್ತಾಯಿಸಿ ರೈತ ಸಂಘಗಳು ಆಯೋಜಿಸುತ್ತಿವೆ. ರೈತರು ಸಾಲ ಮನ್ನಾ, ವಿದ್ಯುತ್ ಮಂಡಳಿಗಳನ್ನು ಖಾಸಗೀಕರಣಗೊಳಿಸುವ ಯೋಜನೆಗಳನ್ನು ಸ್ಥಗಿತಗೊಳಿಸುವುದು ಮತ್ತು ರೈತರು ಮತ್ತು ಕಾರ್ಮಿಕರಿಗೆ ಪಿಂಚಣಿ ನೀಡಬೇಕೆಂದು ಒತ್ತಾಯಿಸುತ್ತಿದ್ದಾರೆ. ಆದರೆ, ಕೇಂದ್ರ ಸಚಿವರೊಂದಿಗೆ ಕನಿಷ್ಠ ಎರಡು ಸುತ್ತಿನ ಮಾತುಕತೆ ವಿಫಲವಾಗಿದ್ದು, ರೈತರು ತಮ್ಮ ಪ್ರತಿಭಟನೆಯನ್ನು ಮುಂದುವರಿಸಲು ನಿರ್ಧರಿಸಿದ್ದಾರೆ.

ತೀರ್ಪು

೨೦೨೧ ರ ರೈತ ಪ್ರತಿಭಟನೆಯ ಸಮಯದಲ್ಲಿ ದೆಹಲಿಗೆ ಹೋಗುವ ರಸ್ತೆಯಲ್ಲಿ ಸ್ಥಾಪಿಸಲಾದ ಬ್ಯಾರಿಕೇಡ್‌ಗಳ ಹಳೆಯ ಫೋಟೋವನ್ನು ನಡೆಯುತ್ತಿರುವ ರೈತ ಪ್ರತಿಭಟನೆಗಳಿಗೆ ಇತ್ತೀಚಿನ ಪೊಲೀಸ್ ದಿಗ್ಬಂಧನ ಎಂದು ತಪ್ಪಾಗಿ ಚಿತ್ರಿಸಲಾಗಿದೆ. ಆದ್ದರಿಂದ, ನಾವು ಈ ಹೇಳಿಕೆಯನ್ನು ಸಂದರ್ಭದಿಂದ ಹೊರಗಿಡಲಾಗಿದೆ ಎಂದು ಗುರುತಿಸಿದ್ದೇವೆ.

(ಅನುವಾದಿಸಿದವರು: ರಜಿನಿ ಕೆ.ಜಿ)

Read this fact-check in English here.