೨೦೨೧ ರ ವೀಡಿಯೋವನ್ನು ಚಂದ್ರಬಾಬು ನಾಯ್ಡು ಅವರು ಪ್ರಮಾಣವಚನ ಸಮಾರಂಭಕ್ಕೂ ಮುನ್ನ 'ಎನ್‌ಡಿಎ ಜೊತೆ ಅಸಮಾಧಾನ' ಎಂದು ಹಂಚಿಕೊಂಡಿದ್ದಾರೆ

ತೆಲುಗು ದೇಶಂ ಪಕ್ಷದ (ಟಿಡಿಪಿ) ರಾಷ್ಟ್ರೀಯ ಅಧ್ಯಕ್ಷ ಚಂದ್ರಬಾಬು ನಾಯ್ಡು, ವೈಎಸ್ಆರ್ ಕಾಂಗ್ರೆಸ್ ಪಕ್ಷದ (ವೈಎಸ್‌ಆರ್‌ಸಿಪಿ) ಜಗನ್ ಮೋಹನ್ ರೆಡ್ಡಿ ಅವರ ಉತ್ತರಾಧಿಕಾರಿಯಾಗಿ ಜೂನ್ ೧೨ ರಂದು ಕೆಸರಪಲ್ಲಿಯಲ್ಲಿ ಎರಡನೇ ಬಾರಿಗೆ ಆಂಧ್ರಪ್ರದೇಶದ ಮುಖ್ಯಮಂತ್ರಿಯಾಗಿ ಪ್ರಮಾಣ ವಚನ ಸ್ವೀಕರಿಸಿದರು. ಅವರ ನಾಲ್ಕು ದಶಕಗಳ ಸುದೀರ್ಘ ರಾಜಕೀಯ ಜೀವನದಲ್ಲಿ, ಇದು ನಾಯ್ಡು ಅವರು ಮುಖ್ಯಮಂತ್ರಿಯಾಗಿ ನಾಲ್ಕನೇ ಅವಧಿ.

ಹೇಳಿಕೆ ಏನು?

ಈ ಘಟನೆಯ ನಂತರ, ನಾಯ್ಡು ಅವರು ಅಸೆಂಬ್ಲಿ ಹಾಲ್‌ನಂತೆ ತೋರುವ ಕೊಠಡಿ ಒಳಗೆ ಅಸಮಾಧಾನಗೊಂಡು, ನಂತರ ಅವರು ಹೊರನಡೆದದ್ದನ್ನು ತೋರಿಸುವ ವೀಡಿಯೋ ಸಾಮಾಜಿಕ ಮಾಧ್ಯಮದಲ್ಲಿ ಹರಡಲು ಪ್ರಾರಂಭಿಸಿತು. ಎನ್‌ಡಿಎ ಪ್ರಮಾಣ ವಚನ ಸ್ವೀಕಾರ ಸಮಾರಂಭಕ್ಕೂ ಮುನ್ನ ಅದನ್ನು ರೆಕಾರ್ಡ್ ಮಾಡಲಾಗಿದೆ ಎಂದು ವೀಡಿಯೋ ತಪ್ಪಾಗಿ ಹೇಳುತ್ತದೆ. ಕ್ಲಿಪ್‌ನಲ್ಲಿ ಸೆರೆಹಿಡಿಯಲಾದ ತೆಲುಗು ಸಂಭಾಷಣೆಯಲ್ಲಿ, ನಾಯ್ಡು ಹೀಗೆ ಹೇಳಿದ್ದಾರೆ, "ನೀವು ನನಗೆ ಹೇಳಿಕೆ ನೀಡಲು ಸಹ ಅನುಮತಿಸಲಿಲ್ಲ. ನಾನು ಸ್ಪಷ್ಟಪಡಿಸಲು ಬಯಸುತ್ತೇನೆ, ನಾನು ಮುಖ್ಯಮಂತ್ರಿಯಾಗಿ ಮಾತ್ರ ಈ ಸದನವನ್ನು ಪ್ರವೇಶಿಸುತ್ತೇನೆ. ಇಲ್ಲದಿದ್ದರೆ, ನನಗೆ ಈ ರಾಜಕೀಯ ಅಗತ್ಯವಿಲ್ಲ."

ದ್ರೌಪದಿಯನ್ನು ಅವಮಾನಿಸಿದ ಮಹಾಭಾರತದ ಕೌರವ ಸಭೆಗೆ ಸಮಾನಾಂತರಗಳನ್ನು ಚಿತ್ರಿಸಿದ ನಾಯ್ಡು, "ಇದು ಕೌರವ ಸಭೆ, ಗೌರವ ಸಭೆಯಲ್ಲ. ನಾನು ಈ ಕೌರವ ಸಭೆಯಲ್ಲಿ ಉಳಿಯುವುದಿಲ್ಲ” ಎಂದು ಹೇಳಿದರು. “ನೀವು ಈ ಅವಮಾನವನ್ನು ಅರ್ಥಮಾಡಿಕೊಂಡು ಹೃದಯಪೂರ್ವಕವಾಗಿ ನನ್ನನ್ನು ಬೆಂಬಲಿಸಬೇಕು. ನಮಸ್ಕಾರಂ'' ಎಂದು ಸಾರ್ವಜನಿಕರಲ್ಲಿ ಮನವಿ ಮಾಡುತ್ತಾರೆ. ‘ನಿಮ್ಮ ವಿನಾಶ ಆರಂಭವಾಗಿದೆ, ನಾವು ಸರ್ಕಾರ ರಚಿಸುತ್ತೇವೆ’ ಎಂದು ಮತ್ತೊಬ್ಬ ವ್ಯಕ್ತಿ ಹೇಳುವುದರೊಂದಿಗೆ ವೀಡಿಯೋ ಮುಕ್ತಾಯವಾಗಿದೆ.

ಎನ್‌ಡಿಎ ಸಮ್ಮಿಶ್ರ ಸರ್ಕಾರವನ್ನು ಬೆಂಬಲಿಸುವ ಮೊದಲು ನಾಯ್ಡು ಅವರು ಅಸಮಾಧಾನಗೊಂಡಿದ್ದರು ಎಂದು ಸೂಚಿಸುವ ಹಿಂದಿ ಶೀರ್ಷಿಕೆಗಳೊಂದಿಗೆ ವೀಡಿಯೋವನ್ನು ಹಂಚಿಕೊಳ್ಳಲಾಗಿದೆ. ಕೆಲವು ಪೋಷ್ಟ್ ಗಳು ನಾಯ್ಡು ಬಿಜೆಪಿಯನ್ನು ಬೆಂಬಲಿಸುವ ಉದ್ದೇಶವನ್ನು ಹೊಂದಿಲ್ಲ ಎಂದು ಸೂಚಿಸಿವೆ. ಈ ಪೋಷ್ಟ್‌ಗಳ ಆರ್ಕೈವ್ ಮಾಡಿದ ಆವೃತ್ತಿಗಳನ್ನು ಇಲ್ಲಿ ಮತ್ತು ಇಲ್ಲಿ ಕಾಣಬಹುದು.

ವೈರಲ್ ಆಗಿರುವ ಸಾಮಾಜಿಕ ಮಾಧ್ಯಮ ಪೋಷ್ಟ್‌ಗಳ ಸ್ಕ್ರೀನ್‌ಶಾಟ್. (ಮೂಲ: ಎಕ್ಸ್/ಫೇಸ್‌ಬುಕ್/ಲಾಜಿಕಲಿ ಫ್ಯಾಕ್ಟ್ಸ್‌ನಿಂದ ಮಾರ್ಪಡಿಸಲಾಗಿದೆ)

ಭಾರತೀಯ ಜನತಾ ಪಕ್ಷ (ಬಿಜೆಪಿ) ನೇತೃತ್ವದ ನ್ಯಾಷನಲ್ ಡೆಮಾಕ್ರಟಿಕ್ ಅಲೈಯನ್ಸ್ (ಎನ್‌ಡಿಎ) ಇತ್ತೀಚೆಗೆ ಭಾರತದ ಸಾರ್ವತ್ರಿಕ ಚುನಾವಣೆಯಲ್ಲಿ ಗೆದ್ದಿದೆ. ಜೂನ್ ೧೦ ರಂದು ನರೇಂದ್ರ ಮೋದಿ ಮತ್ತು ಇತರ ಸಂಸದರು ಪ್ರಮಾಣ ವಚನ ಸ್ವೀಕರಿಸಿದರು. ಟಿಡಿಪಿ ಎನ್‌ಡಿಎ ಭಾಗವಾಗಿದೆ. 

ಆದರೆ, ಈ ಹೇಳಿಕೆ ತಪ್ಪು. ನಾಯ್ಡು ಅವರ ಅಬ್ಬರದ ವೀಡಿಯೋ ಇತ್ತೀಚಿನದಲ್ಲ ಮತ್ತು ಇದು ಎನ್‌ಡಿಎ ಸರ್ಕಾರ ರಚನೆ ಅಥವಾ ಇತ್ತೀಚಿನ ಪ್ರಮಾಣ ವಚನ ಸಮಾರಂಭಕ್ಕೆ ಸಂಬಂಧಿಸಿಲ್ಲ.

ವಾಸ್ತವಾಂಶಗಳೇನು?

ರಿವರ್ಸ್ ಇಮೇಜ್ ಸರ್ಚ್ ಮೂಲಕ, ವೀಡಿಯೋ ನವೆಂಬರ್ ೨೦೨೧ ರ ಹಿಂದಿನದು ಎಂದು ನಿರ್ಧರಿಸಲಾಯಿತು. ನವೆಂಬರ್ ೧೯, ೨೦೨೧ ರಂದು, ವಿ೬ ನ್ಯೂಸ್ ತೆಲುಗು "ಎಪಿ ಅಸೆಂಬ್ಲಿಯಲ್ಲಿ ಚಂದ್ರಬಾಬು ನಾಯ್ಡು ಸಂವೇದನಾಶೀಲ ನಿರ್ಧಾರ" ಎಂಬ ಶೀರ್ಷಿಕೆಯ ಕ್ಲಿಪ್‌ನ ವಿಸ್ತೃತ ಆವೃತ್ತಿಯನ್ನು ಪೋಷ್ಟ್ ಮಾಡಿದೆ (ಇಲ್ಲಿ ಆರ್ಕೈವ್ ಮಾಡಲಾಗಿದೆ). ೦:೦೨ ರ ಟೈಮ್‌ಸ್ಟ್ಯಾಂಪ್ ವೈರಲ್ ವೀಡಿಯೋಗೆ ಹೊಂದಿಕೆಯಾಗುತ್ತದೆ.

ಅಂತೆಯೇ, ಟಿವಿ೫ ನ್ಯೂಸ್ ಘಟನೆಯ ಕುರಿತು ವರದಿ ಮಾಡಿದೆ (ಇಲ್ಲಿ ಆರ್ಕೈವ್ ಮಾಡಲಾಗಿದೆ), ಯೂಟ್ಯೂಬ್‌ನಲ್ಲಿ ವೀಡಿಯೋವನ್ನು "ಅನ್‌ಸೀನ್ ವೀಡಿಯೋ: ಆಂಧ್ರ ಪ್ರದೇಶ ವಿಧಾನಸಭೆಯಲ್ಲಿ ಟಿಡಿಪಿ ಮುಖ್ಯಸ್ಥ ಚಂದ್ರಬಾಬು ನಾಯ್ಡು ಸವಾಲು" ಎಂಬ ಶೀರ್ಷಿಕೆಯೊಂದಿಗೆ ಹಂಚಿಕೊಂಡಿದೆ. ೦:೫೪ ರ ಟೈಮ್‌ಸ್ಟ್ಯಾಂಪ್ ವೈರಲ್ ವೀಡಿಯೋದ ಹೇಳಿಕೆಗಳಿಗೆ ಹೊಂದಿಕೆಯಾಗುತ್ತದೆ.

ನಾಯ್ಡು ಏನು ಪ್ರತಿಕ್ರಿಯಿಸಿದರು?

ಹಿಂದೂಸ್ತಾನ್ ಟೈಮ್ಸ್ ಮತ್ತು ಎನ್‌ಡಿಟಿವಿ ಯಂತಹ ವರದಿಗಳು, ನಾಯ್ಡು ಅವರ ಪ್ರತಿಕ್ರಿಯೆಯನ್ನು ಆಗಿನ ಆಡಳಿತದಲ್ಲಿದ್ದ ವೈಎಸ್‌ಆರ್‌ಸಿಪಿಯ ಸದಸ್ಯರು ಮಾಡಿದ ನಿಂದನೀಯ ಹೇಳಿಕೆಗಳಿಂದ ಪ್ರೇರೇಪಿಸಲಾಗಿದೆ ಎಂದು ಖಚಿತಪಡಿಸುತ್ತವೆ. ನವೆಂಬರ್ ೨೦, ೨೦೨೧ ರಂದು ಆಂಧ್ರ ಪ್ರದೇಶ ವಿಧಾನಸಭೆಯ ಚಳಿಗಾಲದ ಅಧಿವೇಶನದಲ್ಲಿ, ನಾಯ್ಡು ಅವರು ತಮ್ಮ ಪತ್ನಿ ಭುವನೇಶ್ವರಿ ಬಗ್ಗೆ ಮಾಡಿದ ಕಾಮೆಂಟ್‌ಗಳ ಬಗ್ಗೆ ಕೋಪವನ್ನು ವ್ಯಕ್ತಪಡಿಸಿದರು. ವೈಎಸ್‌ಆರ್‌ಸಿಪಿ ಸದಸ್ಯ ಅಂಬಟಿ ರಾಂಬಾಬು ಅವರ ಹೇಳಿಕೆಗೆ ಟಿಡಿಪಿ ಸದಸ್ಯರು ವೇದಿಕೆಗೆ ನುಗ್ಗಿ ಕ್ಷಮೆಯಾಚಿಸುವಂತೆ ಒತ್ತಾಯಿಸಿದರು. 

ಅಸೆಂಬ್ಲಿಯಿಂದ ಹೊರನಡೆದ ನಂತರ, ಟಿಡಿಪಿಯ ರಾಜ್ಯ ಪ್ರಧಾನ ಕಚೇರಿಯಲ್ಲಿ ನಡೆದ ಸುದ್ದಿಗೋಷ್ಠಿಯಲ್ಲಿ ನಾಯ್ಡು ಅವರು ತಮ್ಮ ಪ್ರತಿಕ್ರಿಯೆಯು ತಮ್ಮ ಪತ್ನಿಯ ಬಗ್ಗೆ ಮಾಡಿದ ಅವಹೇಳನಕಾರಿ ಹೇಳಿಕೆಗಳಿಂದಾಗಿ  ಎಂದು ಸ್ಪಷ್ಟಪಡಿಸಿದ್ದಾರೆ. ಎನ್‌ಡಿಟಿವಿ ಪ್ರಕಾರ, "ನನ್ನ ಹೆಂಡತಿ ಎಂದಿಗೂ ರಾಜಕೀಯಕ್ಕೆ ಪ್ರವೇಶಿಸಲಿಲ್ಲ. ನಾನು ಯಾವಾಗಲೂ ಗೌರವ ಮತ್ತು ಗೌರವಕ್ಕಾಗಿ ಬದುಕಿದ್ದೇನೆ. ನಾನು ಅದನ್ನು ತೆಗೆದುಕೊಳ್ಳುವುದಿಲ್ಲ" ಎಂದು ಅವರು ಒತ್ತಿ ಹೇಳಿದರು. 

ತೀರ್ಪು

ನಾಯ್ಡು ಅವರ ಭಾವನಾತ್ಮಕ ಪ್ರಕೋಪವನ್ನು ತೋರಿಸುವ ವೀಡಿಯೋ ೨೦೨೧ ರಲ್ಲಿ ಆಂಧ್ರ ಪ್ರದೇಶ ವಿಧಾನಸಭೆಯಲ್ಲಿ ನಡೆದ ಘಟನೆಯದು. ಮಹಿಳಾ ಸಬಲೀಕರಣದ ಕುರಿತಾದ ಚರ್ಚೆಯ ಸಂದರ್ಭದಲ್ಲಿ ಅವರ ಪತ್ನಿಯ ಬಗ್ಗೆ ಮಾಡಿದ ಅವಹೇಳನಕಾರಿ ಕಾಮೆಂಟ್‌ಗಳಿಗೆ ಪ್ರತಿಕ್ರಿಯೆಯಾಗಿ, ಅವರು ಪ್ರತಿಕ್ರಿಯಿಸಿದ್ದಾರೆ. ಈ ಘಟನೆಯು ಎನ್‌ಡಿಎ ಸರ್ಕಾರ ರಚನೆ ಅಥವಾ ಜೂನ್ ೧೦ ರಂದು ನೆಡೆದ ಪ್ರಮಾಣ ವಚನ ಸ್ವೀಕಾರ ಸಮಾರಂಭಕ್ಕೆ ಸಂಬಂಧಿಸಿಲ್ಲ.

(ಅನುವಾದಿಸಿದವರು: ರಜಿನಿ ಕೆ.ಜಿ)

Read this fact-check in English here.