స్వీడిష్ పాఠశాలలో ఖచ్చితంగా రమదాన్ వేడుకలు జరుపుకోవాలని వచ్చిన కథనం ఫేక్

నేపధ్యం

మునిసిపల్ స్కూళ్లలో ఖచ్చితంగా రమదాన్ వేడుకలు జరుపుకోవాలి అనే శీర్షిక తో డాగెన్స్ నిహీటర్ అనే ఒక స్వీడిష్ వార్త పత్రికలో కథనం వచ్చింది అంటూ ఒక స్క్రీన్ షాట్ ని ఎక్స్ (పూర్వపు ట్విట్టర్) లో మార్చ్ 9, 2024 నాడు ఒక ఎక్స్ అకౌంట్ పోస్ట్ చేసింది. ఆ పోస్ట్ ఆర్కైవ్ ఇక్కడ చూడవచ్చు.  ఆ స్క్రీన్ షాట్ లో స్వీడిష్ సోషల్ డెమోక్రాటిక్ పార్టీకి సంబంధించిన మోర్గాన్ జోహన్సన్ ఈ తీర్మానాన్ని ప్రవేశపెట్టినట్టు ఉంది. పైగా విద్యార్థులు ఈ వేడుకలలో పాల్గొనకపోతే మతం అనే సబ్జెక్టులో వారికి తక్కువ మార్కులు వస్తాయని, ఆ తరువాత పిల్లల తల్లిదండ్రులే వారికి ఇస్లాం మతం గురించి నేర్పే బాధ్యత తీసుకోవాలని తెలిపారు. 

ఈ కథనం రాసే సమయానికి ఎక్స్ లో ఈ పోస్టుకు 100,000 పైగా వ్యూస్ ఉన్నాయి, అనేక మంది యూజర్లు ఈ కథనాన్ని నిజమని నమ్మి మోర్గాన్ గురించి, అతని పార్టీ గురించి, ముస్లింల గురించిన విషయాలపై కామెంట్లలో స్పందిస్తున్నారు.

అయితే ఈ కథనం ఫేక్.  డాగెన్స్ నిహీటర్ వార్త పత్రిక ఇలాంటి కథనాన్ని ఏమి ప్రచురించలేదు.

వాస్తవం ఏమిటి?

ఆ కథనం స్క్రీన్ షాట్ పై ఒక ఎక్స్ అకౌంట్ వాటర్ మార్క్ ని మేము గమనించాము. మా పరిశోధన ప్రకారం, మొదటిగా ఈ స్క్రీన్ షాట్ ని ఈ అకౌంట్ నుండి షేర్ చేశారు. పైగా ఈ కథనంలో కనిపించే ఫొటో కి శీర్షిక కానీ, ఆ ఫోటోగ్రాఫర్ పేరు కానీ ఏమి ఇవ్వలేదు. సాధారణంగా డాగెన్స్ నిహీటర్ పత్రికలో ఇలాంటి వివరాలు అన్నీ మనకి కనిపిస్తాయి. 

ఫేక్ ఆర్టికల్ స్క్రీన్ షాట్ లో ఎక్స్ అకౌంట్ పేరుని ఎరుపు రంగులో హైలైట్ చేశాము (సౌజన్యం : ఎక్స్/స్క్రీన్ షాట్/లాజికల్లీ ఫ్యాక్ట్స్ ఎడిటింగ్)

ఈ కథనం కోసం డాగెన్స్ నిహీటర్ పత్రికలో వెతుకగా మాకు అలాంటి కథనం ఏమి లభించలేదు. పైగా స్వీడిష్ రిక్స్డాగ్ (స్వీడన్ శాసనసభ/పార్లమెంట్) లో కూడా దానికి సంబంధించి అలాంటి తీర్మానాలు తీసుకున్నట్టుగా మాకు ఏ విధమైన పత్రాలు లభించలేదు. రమదాన్ గురించి మొత్తం 19 తీర్మానాలు కనపడినప్పటికీ అందులో ఏ ఒక్కటి కుడా మోర్గాన్ జోహన్సన్ జారీ చేసినది కాదు. 

లాజికల్లీ ఫ్యాక్ట్స్ మోర్గాన్ జోహన్సన్ ని సంప్రదించగా ఆయన అలాంటి తీర్మానం ఏమి తీసుకోలేదని , ఇది పూర్తిగా కల్పితమని తెలిపారు. ఇప్పటిదాకా అలాంటి తీర్మానం ఏదీ రాలేదని, ఆయన ఈ విషయం గురించి తన ఉద్దేశాన్ని కుడా ఎప్పుడూ తెలపలేదని మాకు తెలియజేసారు. లాజికల్లీ ఫ్యాక్ట్స్ డాగెన్స్ నిహీటర్ పత్రికను కూడా సంప్రదించింది.

ఆ ఎక్స్ అకౌంట్ గతంలో కుడా కొన్ని వ్యంగ్య రచనలని స్వీడిష్ న్యూస్ పేపర్ కథనాలుగా షేర్ చేసింది. కానీ ప్రస్తుతం షేర్ అవుతున్న కధనాన్ని మాత్రం అనేక మంది వాస్తవం అనుకుని నమ్మారు.

తీర్పు

డాగెన్స్ నిహీటర్ పత్రిక రమదాన్ వేడుక గురించి వైరల్ అవుతున్న కథనాన్ని ప్రచురించలేదు. మోర్గాన్ జోహన్సన్ కుడా అలాంటి తీర్మానాన్ని ప్రవేశపెట్టలేదని లాజికల్లీ ఫ్యాక్ట్స్ కు నిర్ధారించారు. కనుక మేము ఈ క్లెయిమ్ ఫేక్ అని నిర్ధారించాము. 

(అనువాదం : రాజేశ్వరి పరస)

Read this article in English here