ರಾತ್ರಿ ೧೦ ರಿಂದ ಬೆಳಿಗ್ಗೆ ೬ ರವರೆಗೆ ಭಾರತದಲ್ಲಿ ಮಹಿಳೆಯರಿಗೆ ಉಚಿತ ಕ್ಯಾಬ್ ಸೇವೆ? ವೈರಲ್ ಸಂದೇಶವು ಒಂದು ಗಾಳಿಸುದ್ದಿ

ಹೇಳಿಕೆ ಏನು?

ಮನೆಗೆ ಸಾರಿಗೆಯನ್ನು ಹುಡುಕಲು ಸಾಧ್ಯವಾಗದ ಮಹಿಳೆಯರಿಗೆ ಉಚಿತ ರಾತ್ರಿ ಸವಾರಿಗಳನ್ನು ನೀಡುವ ರಾಷ್ಟ್ರವ್ಯಾಪಿ ಸೇವೆಯನ್ನು ಭಾರತೀಯ ಪೊಲೀಸರು ಪ್ರಾರಂಭಿಸಿದ್ದಾರೆ ಎಂದು ವ್ಯಾಪಕವಾಗಿ ಪ್ರಸಾರವಾದ ವಾಟ್ಸ್ಆಪ್ ಸಂದೇಶವು ಹೇಳುತ್ತದೆ. "೧೦೯೧" ಅಥವಾ "೭೮೩೭೦೧೮೫೫೫" ಗೆ ಕರೆ ಮಾಡುವ ಮೂಲಕ ಮಹಿಳೆಯರು ಈ ಸೇವೆಯನ್ನು ಪಡಯಬಹುದು ಎಂದು ಸಂದೇಶವು ಹೇಳುತ್ತದೆ. 

ಸಂಪೂರ್ಣ ಸಂದೇಶವು ಹೀಗಿದೆ: “ಪೊಲೀಸರು ಉಚಿತ ಪ್ರಯಾಣ ಯೋಜನೆಯನ್ನು ಪ್ರಾರಂಭಿಸಿದ್ದಾರೆ, ಅಲ್ಲಿ ಯಾವುದೇ ಮಹಿಳೆ ರಾತ್ರಿ ೧೦ ರಿಂದ ಬೆಳಿಗ್ಗೆ ೬ ರವರೆಗೆ ಮನೆಗೆ ಹೋಗಲು ವಾಹನ ಸಿಗದಿದ್ದಲ್ಲಿ ಪೊಲೀಸ್ ಸಹಾಯವಾಣಿ ಸಂಖ್ಯೆಗಳನ್ನು (೧೦೯೧ ಮತ್ತು ೭೮೩೭೦೧೮೫೫೫) ಸಂಪರ್ಕಿಸಿ ಮತ್ತು ವಾಹನವನ್ನು ವಿನಂತಿಸಬಹುದು. ಅವರು ೨೪X೭ ಗಂಟೆಗಳ ಕಾಲ ಕೆಲಸ ಮಾಡುತ್ತಾರೆ. ನಿಯಂತ್ರಣ ಕೊಠಡಿಯ ವಾಹನ ಅಥವಾ ಹತ್ತಿರದ ಪಿಸಿಆರ್ ವಾಹನ/ಎಸ್‌ಎಚ್‌ಒ ವಾಹನವು ಅವರನ್ನು ಸುರಕ್ಷಿತವಾಗಿ ಅವರ ಗಮ್ಯಸ್ಥಾನಕ್ಕೆ ಬಿಡುತ್ತದೆ. ಇದನ್ನು ಉಚಿತವಾಗಿ ಮಾಡಲಾಗುವುದು. ನಿಮಗೆ ತಿಳಿದಿರುವ ಎಲ್ಲರಿಗೂ ಈ ಸಂದೇಶವನ್ನು ಹರಡಿ. ನಿಮ್ಮ ಹೆಂಡತಿ, ಹೆಣ್ಣುಮಕ್ಕಳು, ಸಹೋದರಿಯರು, ತಾಯಂದಿರು, ಸ್ನೇಹಿತರು ಮತ್ತು ನಿಮಗೆ ತಿಳಿದಿರುವ ಎಲ್ಲಾ ಮಹಿಳೆಯರಿಗೆ ಸಂಖ್ಯೆಯನ್ನು ಕಳುಹಿಸಿ. ಸಂಖ್ಯೆಗಳನ್ನು ಪಟ್ಟಿ ಮಾಡಿಕೊಳ್ಳಿ ಎಂದು ಅವರನ್ನು ಕೇಳಿ. ಎಲ್ಲಾ ಪುರುಷರು ದಯವಿಟ್ಟು ನಿಮಗೆ ತಿಳಿದಿರುವ ಎಲ್ಲಾ ಮಹಿಳೆಯರೊಂದಿಗೆ ಇದನ್ನು ಹಂಚಿಕೊಳ್ಳಿ. ತುರ್ತು ಸಂದರ್ಭಗಳಲ್ಲಿ ಮಹಿಳೆಯರು ಖಾಲಿ ಸಂದೇಶಗಳನ್ನು ಅಥವಾ ಮಿಸ್ಡ್ ಕಾಲ್‌ಗಳನ್ನು ಕಳುಹಿಸಬಹುದು. ಇದರಿಂದ ಪೊಲೀಸರು ನಿಮ್ಮ ಸ್ಥಳವನ್ನು ಹುಡುಕಬಹುದು ಮತ್ತು ನಿಮಗೆ ಸಹಾಯ ಮಾಡಬಹುದು. ಭಾರತದಾದ್ಯಂತ ಅನ್ವಯಿಸುತ್ತದೆ (sic).”

ಈ ಸೇವೆಯು ಲಭ್ಯವಿರುವ ಯಾವುದೇ ನಿರ್ದಿಷ್ಟ ರಾಜ್ಯ ಅಥವಾ ನಗರದ ಕುರಿತು ಸಂದೇಶವು ವಿವರಗಳನ್ನು ಹೊಂದಿಲ್ಲ ಮತ್ತು ರಾಷ್ಟ್ರವ್ಯಾಪಿ ಅನ್ವಯಿಸುವಿಕೆಯನ್ನು ಸಂದೇಶ ತಿಳಿಸುತ್ತದೆ.

ವೈರಲ್ ಸಂದೇಶದ ಸ್ಕ್ರೀನ್‌ಶಾಟ್. (ಮೂಲ: ವಾಟ್ಸ್ಆಪ್/ಲಾಜಿಕಲಿ ಫ್ಯಾಕ್ಟ್ಸ್ ನಿಂದ ಮಾರ್ಪಡಿಸಲಾಗಿದೆ)

ಆದರೆ, ಹೇಳಿಕೆ ಸಂದರ್ಭದಿಂದ ಹೊರಗಿಡಲಾಗಿದೆ. ಈ ಸೇವೆಯನ್ನು ಆರಂಭದಲ್ಲಿ ಲುಧಿಯಾನ ಪೊಲೀಸರು ೨೦೧೯ ರಲ್ಲಿ ಪರಿಚಯಿಸಿದರು ಆದರೆ ರಾಷ್ಟ್ರವ್ಯಾಪಿ ಜಾರಿಗೆ ಬಂದಿರಲಿಲ್ಲ.

ನಾವು ಏನು ಕಂಡುಕೊಂಡಿದ್ದೇವೆ

ಲಾಜಿಕಲಿ ಫ್ಯಾಕ್ಟ್ಸ್ ಈ ಸೇವೆಯನ್ನು ಮೂಲತಃ ೨೦೧೯ ರಲ್ಲಿ ಲುಧಿಯಾನ ಪೊಲೀಸರು ಪರಿಚಯಿಸಿದ್ದು, ಮಹಿಳೆಯರ ಸುರಕ್ಷತೆಯನ್ನು ಹೆಚ್ಚಿಸುವ ಮತ್ತು ಅಪರಾಧವನ್ನು ತಡೆಗಟ್ಟುವ ಗುರಿಯನ್ನು ಹೊಂದಿದೆ. ನವೆಂಬರ್ ೨೯, ೨೦೧೯ ರಂದು ಹೈದರಾಬಾದ್‌ನ ಹೊರವಲಯದಲ್ಲಿ ೨೬ ವರ್ಷದ ಪಶುವೈದ್ಯೆಯ ಸಾಮೂಹಿಕ ಅತ್ಯಾಚಾರ ಮತ್ತು ಹತ್ಯೆಯ ನಂತರ ಈ ಉಪಕ್ರಮವನ್ನು ಪ್ರಾರಂಭಿಸಲಾಗಿದೆ ಎಂದು ಡಿಸೆಂಬರ್ ೧, ೨೦೧೯ ರ ಹಿಂದೂಸ್ತಾನ್ ಟೈಮ್ಸ್ ವರದಿ ಹೇಳುತ್ತದೆ.

ವರದಿಯ ಪ್ರಕಾರ, ಪೊಲೀಸ್ ಕಮಿಷನರ್ ರಾಕೇಶ್ ಅಗರವಾಲ್ ಮಹಿಳೆಯರಿಗೆ ರಾತ್ರಿ ೧೦ ಗಂಟೆಯಿಂದ ಬೆಳಿಗ್ಗೆ ೬ ಗಂಟೆ ನಡುವೆ ಸಾರಿಗೆಯನ್ನು ಹುಡುಕಲು ಸಾಧ್ಯವಾಗದಿದ್ದಾಗ ಮನೆಗೆ ಉಚಿತ ಸವಾರಿಯನ್ನು ವಿನಂತಿಸಲು - ಸಹಾಯವಾಣಿ ಸಂಖ್ಯೆಗಳಿಗೆ ಕರೆ ಮಾಡಬಹುದು — ೧೧೨, ೧೦೯೧, ಅಥವಾ ೭೮೩೭೦೧೮೫೫೫, ಎಂದು ದೃಢಪಡಿಸಿದರು. ಈ ಸೇವೆಯು ಪ್ರತಿದಿನ ಲಭ್ಯವಿರುತ್ತದೆ ಮತ್ತು ಪೊಲೀಸ್ ನಿಯಂತ್ರಣ ಕೊಠಡಿ (ಪಿಸಿಆರ್) ವ್ಯಾನ್ ಅಥವಾ ಸ್ಟೇಷನ್ ಹೌಸ್ ಆಫೀಸರ್ (ಎಸ್‌ಎಚ್‌ಒ) ವಾಹನವು ಯಾವುದೇ ವೆಚ್ಚವಿಲ್ಲದೆ ಮಹಿಳೆಯರನ್ನು ಅವರ ಸ್ಥಳಗಳಿಗೆ ಬಿಡುತ್ತವೆ.

ಸಂಖ್ಯೆಗಳು ಇನ್ನೂ ಸಕ್ರಿಯವಾಗಿವೆಯೇ?

೧೦೯೧ ಸಹಾಯವಾಣಿಯು ರಾಷ್ಟ್ರೀಯ ಮಹಿಳಾ ಆಯೋಗದ (NCW) ಅಡಿಯಲ್ಲಿ ಕೇಂದ್ರ ಸಮಾಜ ಕಲ್ಯಾಣ ಮಂಡಳಿಯು ನೀಡಿದ ರಾಷ್ಟ್ರವ್ಯಾಪಿ ಸಂಖ್ಯೆಯಾಗಿದೆ. ಸಂಕಷ್ಟದಲ್ಲಿರುವ ಮಹಿಳೆಯರನ್ನು ಬೆಂಬಲಿಸಲು ಇದನ್ನು ವಿನ್ಯಾಸಗೊಳಿಸಲಾಗಿದೆ ಮತ್ತು ಭಾರತದಾದ್ಯಂತ ಸಕ್ರಿಯವಾಗಿದೆ. 

ಲಾಜಿಕಲಿ ಫ್ಯಾಕ್ಟ್ಸ್ ಲೂಧಿಯಾನ ಪೊಲೀಸರನ್ನು ಇತರ ಸಂಖ್ಯೆಗೆ (೭೮೩೭೦೧೮೫೫೫) ಸಂಬಂಧಿಸಿದಂತೆ ಸಂಪರ್ಕಿಸಿತು. ಈ ಸಂಖ್ಯೆ ಕಾರ್ಯನಿರ್ವಹಿಸುತ್ತಿದೆ ಎಂದು ಹೆಚ್ಚುವರಿ ಪೊಲೀಸ್ ಉಪ ಆಯುಕ್ತ ಗುರುಪ್ರೀತ್ ಕೌರ್ ಪುರೆವಾಲ್ ಖಚಿತಪಡಿಸಿದ್ದಾರೆ. ಲುಧಿಯಾನದ ಮಹಿಳಾ ಡೆಸ್ಕ್ ಹೆಲ್ಪ್ ಆಫೀಸರ್ (ಡಬ್ಲ್ಯುಎಚ್‌ಡಿಒ) ಇನ್ಸ್‌ಪೆಕ್ಟರ್ ರಶ್‌ಪಾಲ್ ಕೌರ್, ಸೇವೆಯು ಸಕ್ರಿಯವಾಗಿದೆ, ಇದು ಲುಧಿಯಾನದಲ್ಲಿ ಮಾತ್ರ ಅನ್ವಯಿಸುತ್ತದೆ ಎಂದು ದೃಢಪಡಿಸಿದರು.

ಇದು ರಾಷ್ಟ್ರವ್ಯಾಪಿ ಸೇವೆಯೇ?

ಸಹಾಯವಾಣಿ ಸಂಖ್ಯೆ "೭೮೩೭೦೧೮೫೫೫" ಅನ್ನು ಲುಧಿಯಾನ ಪೊಲೀಸರು ಪರಿಚಯಿಸಿದ್ದಾರೆ ಮತ್ತು ಇದು ರಾಷ್ಟ್ರವ್ಯಾಪಿ ಸೇವೆಯಲ್ಲ. 

ಸಂದೇಶದ ವೈರಲ್ ಹರಡುವಿಕೆಯ ನಂತರ, ಕರ್ನಾಟಕ ರಾಜ್ಯ ಪೊಲೀಸರು ಎಕ್ಸ್ (ಹಿಂದೆ ಟ್ವಿಟರ್) ನಲ್ಲಿ ಹೇಳಿಕೆಯನ್ನು ನೀಡಿದರು, ಸಂದೇಶವನ್ನು ನಕಲಿ ಎಂದು ಲೇಬಲ್ ಮಾಡಿದ್ದಾರೆ (ಇಲ್ಲಿ ಆರ್ಕೈವ್ ಮಾಡಲಾಗಿದೆ). ಬೆಂಗಳೂರು ನಗರ ಪೊಲೀಸರು ಕೂಡ ಎಕ್ಸ್ (ಇಲ್ಲಿ ಆರ್ಕೈವ್ ಮಾಡಲಾಗಿದೆ) ಬಗ್ಗೆ ಇದೇ ರೀತಿಯ ಸ್ಪಷ್ಟೀಕರಣವನ್ನು ನೀಡಿದ್ದಾರೆ.

ಕರ್ನಾಟಕ ರಾಜ್ಯ ಪೊಲೀಸರ ಸ್ಪಷ್ಟೀಕರಣದ ಸ್ಕ್ರೀನ್‌ಶಾಟ್. (ಮೂಲ: ಎಕ್ಸ್)

ಹೈದರಾಬಾದ್ ಸಿಟಿ ಪೊಲೀಸರು  ಎಕ್ಸ್ (ಇಲ್ಲಿ ಆರ್ಕೈವ್ ಮಾಡಲಾಗಿದೆ), "@hydcitypolice ನೀಡುತ್ತಿರುವ "ಉಚಿತ ಸವಾರಿ ಸೇವೆ" ಕುರಿತು ಸಾಮಾಜಿಕ ಮಾಧ್ಯಮದಲ್ಲಿ #ತಪ್ಪುದಾರಿಗೆಳೆಯುವ ಮಾಹಿತಿಯನ್ನು ನಾವು ನೋಡಿದ್ದೇವೆ, ಇದು ಸರಿಯಲ್ಲ, ಯಾವಾಗಲೂ ವಿಶ್ವಾಸಾರ್ಹ ಮೂಲಗಳೊಂದಿಗೆ ಸತ್ಯವನ್ನು ಪರಿಶೀಲಿಸಿ ತಪ್ಪು ಮಾಹಿತಿಯನ್ನು ಹರಡುವುದು ಅನಗತ್ಯ ಭಯವನ್ನು ಉಂಟುಮಾಡುತ್ತದೆ.

ಹೈದರಾಬಾದ್ ಸಿಟಿ ಪೊಲೀಸರ ಪೋಸ್ಟ್‌ನ ಸ್ಕ್ರೀನ್‌ಶಾಟ್. (ಮೂಲ: ಎಕ್ಸ್)

ಪುರಾವೆಗಳ ಆಧಾರದ ಮೇಲೆ, ಸಂದೇಶದಲ್ಲಿ ಉಲ್ಲೇಖಿಸಲಾದ ಸಹಾಯವಾಣಿ ಸಂಖ್ಯೆಗಳು, ಮಹಿಳೆಯರಿಗೆ ರಾತ್ರಿಯಲ್ಲಿ ಉಚಿತ ಕ್ಯಾಬ್ ಸೇವೆಯನ್ನು ಒದಗಿಸುವುದಾಗಿ ಹೇಳಿಕೊಳ್ಳುವುದು ಲುಧಿಯಾನದಲ್ಲಿ ಮಾತ್ರ ಮಾನ್ಯವಾಗಿದೆ ಮತ್ತು ರಾಷ್ಟ್ರವ್ಯಾಪಿ ಸೇವೆಯಲ್ಲ ಎಂದು ನಾವು ಖಚಿತಪಡಿಸುತ್ತೇವೆ.

ತೀರ್ಪು

ನಿರ್ದಿಷ್ಟ ಸಹಾಯವಾಣಿ ಸಂಖ್ಯೆಗಳ ಮೂಲಕ ಮಹಿಳೆಯರಿಗೆ ರಾಷ್ಟ್ರವ್ಯಾಪಿ ಉಚಿತ ರಾತ್ರಿ ಸವಾರಿ ಸೇವೆಯ ಸಂದೇಶ ಸಂದರ್ಭದಿಂದ ಹೊರಗಿದೆ. ಒದಗಿಸಿದ ಸಂಖ್ಯೆಗಳು ಲುಧಿಯಾನದಲ್ಲಿನ ಸೇವೆಗೆ ಮಾತ್ರ ಮಾನ್ಯವಾಗಿರುತ್ತವೆ ಮತ್ತು ಭಾರತದಾದ್ಯಂತ ಅನ್ವಯಿಸುವುದಿಲ್ಲ. ಈ ವೈರಲ್ ಸಂದೇಶ ಫೇಕ್ ಎಂದು ಕರ್ನಾಟಕ ರಾಜ್ಯ ಮತ್ತು ಹೈದರಾಬಾದ್ ನಗರ ಪೊಲೀಸರು ದೃಢಪಡಿಸಿದ್ದಾರೆ.

(ಅನುವಾದಿಸಿದವರು: ರಜಿನಿ ಕೆ.ಜಿ)

Read this fact-check in English here.