ಕೇರಳದಲ್ಲಿ ಪಾಕಿಸ್ತಾನ ಕ್ರಿಕೆಟ್ ಜೆರ್ಸಿ ಧರಿಸಿರುವ ಐಯುಎಂಎಲ್‌ ಸ್ವಯಂಸೇವಕರನ್ನು ವೀಡಿಯೋ ತೋರಿಸುವುದಿಲ್ಲ

ಹೇಳಿಕೆ ಏನು?

ಕೇರಳದ ಕಾಸರಗೋಡು ಜಿಲ್ಲೆಯ ಆರಂಗಡಿ ಗ್ರಾಮದಲ್ಲಿ ಇಂಡಿಯನ್ ಯೂನಿಯನ್ ಮುಸ್ಲಿಂ ಲೀಗ್ (ಐಯುಎಂಎಲ್) ಕಚೇರಿ ಉದ್ಘಾಟನೆ ಸಂದರ್ಭದಲ್ಲಿ ಪಾಕಿಸ್ತಾನ ರಾಷ್ಟ್ರೀಯ ಕ್ರಿಕೆಟ್ ತಂಡದ ಜೆರ್ಸಿಯನ್ನು ಧರಿಸಿರುವ ಜನರನ್ನು ಇದು ತೋರಿಸುತ್ತದೆ ಎಂದು ಹೇಳಿಕೊಂಡು ಹಲವಾರು ಸಾಮಾಜಿಕ ಮಾಧ್ಯಮ ಬಳಕೆದಾರರು ವೀಡಿಯೋವನ್ನು ಹಂಚಿಕೊಳ್ಳುತ್ತಿದ್ದಾರೆ. ಕೇರಳದ ಪ್ರಮುಖ ಸಮುದಾಯದ ನಾಯಕ ಪಾಣಕ್ಕಾಡ್ ಶಿಹಾಬ್ ತಂಗಲ್ ಅವರನ್ನು ಹೊಗಳಿ ಜನರು ಘೋಷಣೆಗಳನ್ನು ಕೂಗುತ್ತಿರುವುದನ್ನು ವೀಡಿಯೋ ಒಳಗೊಂಡಿದೆ.

ಈ ವೀಡಿಯೋವನ್ನು ಶೇರ್ ಮಾಡಿದ ಒಬ್ಬ ಎಕ್ಸ್ (ಹಿಂದೆ ಟ್ವಿಟರ್) ಬಳಕೆದಾರರು, "ಕಾಸರಗೋಡಿನಲ್ಲಿ ಲೀಗ್ (ಐಯುಎಂಎಲ್) ಕಚೇರಿಯನ್ನು ಪಾಕಿಸ್ತಾನಿ ಕ್ರಿಕೆಟ್ ತಂಡದ ಜೆರ್ಸಿ (ಮಲಯಾಳಂನಿಂದ ಅನುವಾದಿಸಲಾಗಿದೆ) ಧರಿಸಿ ಉದ್ಘಾಟಿಸಲಾಯಿತು" ಎಂದು ಶೀರ್ಷಿಕೆ ನೀಡಿದ್ದಾರೆ. 

ಕೇರಳದ ಜನರು ಪಾಕಿಸ್ತಾನಿ ಕ್ರಿಕೆಟ್ ಜೆರ್ಸಿಯನ್ನು ಧರಿಸಿದ್ದಾರೆ ಎಂದು ಸಾಮಾಜಿಕ ಮಾಧ್ಯಮ ಬಳಕೆದಾರರು ಹೇಳುತ್ತಾರೆ. (ಮೂಲ: ಎಕ್ಸ್/ ಲಾಜಿಕಲಿ ಫ್ಯಾಕ್ಟ್ಸ್‌ನಿಂದ ಮಾರ್ಪಡಿಸಲಾಗಿದೆ)

ಮತ್ತೊಂದು ಪೋಷ್ಟ್ ೫೩,೦೦೦ ಕ್ಕೂ ಹೆಚ್ಚು ವೀಕ್ಷಣೆಗಳನ್ನು ಗಳಿಸಿದೆ ಮತ್ತು ಹೀಗೆ ಹೇಳುತ್ತದೆ: "ಇಸ್ಲಾಮಾಬಾದ್‌ನಲ್ಲಿ ಅಲ್ಲ, ಪೇಶಾವರ್‌ನಲ್ಲಿ ಅಲ್ಲ!! ಕೇರಳದ ಕಾಸರಗೋಡಿನಲ್ಲಿ, ಶಾಂತಿಯುತ ಜನರು ಪಾಕಿಸ್ತಾನದ ಕ್ರಿಕೆಟ್ ತಂಡದ ಜೆರ್ಸಿಯನ್ನು ಧರಿಸಿ ಮುಸ್ಲಿಂ ಲೀಗ್ ಕಚೇರಿಯನ್ನು ತೆರೆಯುವ ಮೂಲಕ ಆಚರಿಸುತ್ತಿದ್ದಾರೆ.!!🤬 #Kerala #KeralaStory #Peaceful #Pakistan #KeralaNews.” ಈ ಹೇಳಿಕೆಗಳ ಆರ್ಕೈವ್ ಮಾಡಿದ ಆವೃತ್ತಿಗಳನ್ನು ಇಲ್ಲಿ, ಇಲ್ಲಿ ಮತ್ತು ಇಲ್ಲಿ ಕಾಣಬಹುದು.

ಆದರೆ, ತನಿಖೆಯ ನಂತರ, ವೀಡಿಯೋದಲ್ಲಿ ಕಂಡುಬರುವ ಹಸಿರು ಜೆರ್ಸಿಗಳಲ್ಲಿ ಮುಸ್ಲಿಂ ಲೀಗ್ ಲಾಂಛನ ಮತ್ತು ಕೇರಳದ 'ಅರಂಗಡಿ' ಎಂಬ ಸ್ಥಳದ ಹೆಸರನ್ನು ಬರೆಯಲಾಗಿದೆ ಮತ್ತು ಪಾಕಿಸ್ತಾನಿ ಕ್ರಿಕೆಟ್ ತಂಡಕ್ಕೆ ಸಂಬಂಧವಿಲ್ಲ ಎಂದು ನಾವು ಕಂಡುಕೊಂಡಿದ್ದೇವೆ.

ವಾಸ್ತವಾಂಶಗಳೇನು?

ಪಾಕಿಸ್ತಾನ ಕ್ರಿಕೆಟ್ ಮಂಡಳಿಯ ಅಧಿಕೃತ ವೆಬ್‌ಸೈಟ್‌ನ ಮರ್ಚಂಡೈಸ್ ಪುಟದಲ್ಲಿ ಲಭ್ಯವಿರುವ ಪಾಕಿಸ್ತಾನ ರಾಷ್ಟ್ರೀಯ ಕ್ರಿಕೆಟ್ ತಂಡದ ಅಧಿಕೃತ ಜೆರ್ಸಿಗೆ ವೈರಲ್ ವೀಡಿಯೊದಲ್ಲಿರುವ ಜೆರ್ಸಿಗಳನ್ನು ಹೋಲಿಸುವ ಮೂಲಕ ನಾವು ನಮ್ಮ ತನಿಖೆಯನ್ನು ಪ್ರಾರಂಭಿಸಿದ್ದೆವು. 

ಇತ್ತೀಚೆಗೆ ಮುಕ್ತಾಯಗೊಂಡ ೨೦೨೪ ರ ಟಿ ೨೦ ವಿಶ್ವಕಪ್‌ಗಾಗಿ ಬಹಿರಂಗಪಡಿಸಲಾದ 'ಮ್ಯಾಟ್ರಿಕ್ಸ್' ಹೆಸರಿನ ಜೆರ್ಸಿಯನ್ನು ಪರಿಶೀಲಿಸಿದಾಗ, ಅದು ಐಸಿಸಿ ಲೋಗೋವನ್ನು ಹೊಂದಿದೆ ಮತ್ತು ಮೇಲಿನ ಎಡಭಾಗದಲ್ಲಿ ಟಿ ೨೦ ಎಂದು ಬರೆದಿದೆ ಎಂದು ನಾವು ಕಂಡುಕೊಂಡಿದ್ದೇವೆ. ಜರ್ಸಿಯು ಗಾಢ ಹಸಿರು ಜ್ಯಾಮಿತೀಯ ಆಕಾರಗಳನ್ನು ಹೊಂದಿದ್ದು, ಮಧ್ಯದಲ್ಲಿ 'ಪಾಕಿಸ್ತಾನ್' ಎಂದು ಪ್ರಮುಖವಾಗಿ ಇಂಗ್ಲಿಷ್‌ನಲ್ಲಿ ಬರೆಯಲಾಗಿದೆ, ಜೊತೆಗೆ ಉರ್ದುವಿನಲ್ಲಿ ಬರೆದ 'ಪಾಕಿಸ್ತಾನ' ಹೊಂದಿರುವ ದೊಡ್ಡ ಗೋಲ್ಡನ್ ಸ್ಟಾರ್ ಅನ್ನು ಹೊಂದಿದೆ. ಜೆರ್ಸಿಯ ತೋಳುಗಳ ಮೇಲೆ ಪ್ರಾಯೋಜಕರ ಹೆಸರುಗಳನ್ನು ಪ್ರದರ್ಶಿಸಲಾಗುತ್ತದೆ. ಹೆಚ್ಚುವರಿಯಾಗಿ, ಈ ಜೆರ್ಸಿಯ ಹಿಂಭಾಗವು ಆಟಗಾರನ ಹೆಸರಿನೊಂದಿಗೆ ಸಣ್ಣ ಪಾಕಿಸ್ತಾನಿ ರಾಷ್ಟ್ರೀಯ ಧ್ವಜವನ್ನು ಹೊಂದಿದೆ.

೨೦೨೪ ರ ಐಸಿಸಿ ಟಿ೨೦ ವಿಶ್ವಕಪ್‌ಗಾಗಿ ಪಾಕಿಸ್ತಾನದ ಅಧಿಕೃತ ಜೆರ್ಸಿ. (ಮೂಲ: PCB/ಲಾಜಿಕಲಿ ಫ್ಯಾಕ್ಟ್ಸ್‌ನಿಂದ ಮಾರ್ಪಡಿಸಲಾಗಿದೆ)

ನಾವು ಪಾಕಿಸ್ತಾನಿ ಕ್ರಿಕೆಟ್ ತಂಡದ ODI (ಏಕದಿನ ಅಂತಾರಾಷ್ಟ್ರೀಯ) ಜೆರ್ಸಿಯನ್ನೂ ಸಹ ಪರಿಶೀಲಿಸಿದ್ದೇವೆ ಮತ್ತು ಅದು ಅವರ ಟಿ೨೦ ಕಿಟ್‌ಗೆ ಬಹುತೇಕ ಹೋಲುತ್ತದೆ ಎಂದು ಕಂಡುಕೊಂಡಿದ್ದೇವೆ, ಅದು ಟಿ೨೦ ವಿಶ್ವಕಪ್ ೨೦೨೪ ಲೋಗೋವನ್ನು ಹೊಂದಿಲ್ಲ ಆದರೆ ಅದರ ಬದಲಿಗೆ ಮುಂಭಾಗದಲ್ಲಿ ಪ್ರಾಯೋಜಕರ ಹೆಸರುಗಳು ಮತ್ತು ಲೋಗೋಗಳನ್ನು ಹೊಂದಿದೆ. 

ಇದಕ್ಕೆ ವ್ಯತಿರಿಕ್ತವಾಗಿ, ವೈರಲ್ ವೀಡಿಯೋದಲ್ಲಿ ಕಂಡುಬರುವ ಜೆರ್ಸಿಗಳು ಹಸಿರು ಬಣ್ಣದ್ದಾಗಿದ್ದರೂ, ಮುಂಭಾಗದಲ್ಲಿ ಇಂಗ್ಲಿಷ್‌ನಲ್ಲಿ 'ಅರಂಗಡಿ' ಎಂದು ಬರೆಯಲಾಗಿದೆ ಮತ್ತು ಪಾಕಿಸ್ತಾನಿ ಜೆರ್ಸಿಯಂತಲ್ಲದೆ (ಇಲ್ಲಿ ಆರ್ಕೈವ್ ಮಾಡಲಾಗಿದೆ) ಮೇಲಿನ ಬಲಭಾಗದಲ್ಲಿ ಅರ್ಧಚಂದ್ರ ಮತ್ತು ನಕ್ಷತ್ರವನ್ನು ಬರೆಯಲಾಗಿದೆ. ಇದನ್ನು ಕೆಳಗಿನ ಚಿತ್ರದಲ್ಲಿ ನೋಡಬಹುದು.

ವೈರಲ್ ವೀಡಿಯೋದಿಂದ ಸ್ಕ್ರೀನ್‌ಶಾಟ್ (ಮೂಲ: ಎಕ್ಸ್/ಲಾಜಿಕಲಿ ಫ್ಯಾಕ್ಟ್ಸ್‌ನಿಂದ ಮಾರ್ಪಡಿಸಲಾಗಿದೆ)

ಸಂಬಂಧಿತ ಕೀವರ್ಡ್‌ಗಳನ್ನು ಬಳಸಿಕೊಂಡು, ನಾವು 'ಪಚ್ಚಪದ ಅರಂಗಡಿ' (ಮಲಯಾಳಂನಿಂದ ಅನುವಾದಿಸಲಾಗಿದೆ: പച്ചപ്പട ആറങ്ങാടി) ಎಂಬ ಫೇಸ್‌ಬುಕ್ ಪುಟವನ್ನು ಕಂಡುಕೊಂಡಿದ್ದೇವೆ. ಅಲ್ಲಿ ಜೂನ್ ೨೯, ೨೦೨೪ ರಂದು ಅದೇ ಜೆರ್ಸಿ (ಇಲ್ಲಿ ಮತ್ತು ಇಲ್ಲಿ ಆರ್ಕೈವ್ ಮಾಡಲಾಗಿದೆ) ಮತ್ತು ಅದೇ ಕಚೇರಿ ಕಟ್ಟಡದ ಮುಂದೆ ಸಭೆಯ ಹಲವಾರು ಸ್ಪಷ್ಟವಾದ ವೀಡಿಯೋಗಳನ್ನು ಪೋಷ್ಟ್ ಮಾಡಲಾಗಿದೆ ( ಇಲ್ಲಿ ಆರ್ಕೈವ್ ಮಾಡಲಾಗಿದೆ).

ಈ ದೃಶ್ಯಗಳನ್ನು ಎಚ್ಚರಿಕೆಯಿಂದ ಪರಿಶೀಲಿಸಿದಾಗ, ಜರ್ಸಿಯ ತೋಳುಗಳು 'ಎಂವೈಎಲ್’ (ಮುಸ್ಲಿಂ ಯೂತ್ ಲೀಗ್) ಮತ್ತು 'ಐಯುಎಂಎಲ್‌' (ಇಂಡಿಯನ್ ಯೂನಿಯನ್ ಮುಸ್ಲಿಂ ಲೀಗ್) ಪದಗಳನ್ನು ಸ್ಪಷ್ಟವಾಗಿ ಪ್ರದರ್ಶಿಸುತ್ತವೆ ಎಂದು ನಾವು ಗಮನಿಸಿದ್ದೇವೆ. ಈ ಜೆರ್ಸಿಯ ಮುಂಭಾಗವು ಪಕ್ಷದ ಲೋಗೋವನ್ನು ಹೊಂದಿದೆ, ಇದು 'ಪಚ್ಚಪದ ಆರಂಗಡಿ' ಫೇಸ್‌ಬುಕ್ ಪುಟದ ಪ್ರೊಫೈಲ್ ಚಿತ್ರಕ್ಕೆ ಹೊಂದಿಕೆಯಾಗುತ್ತದೆ. ಈ ಎಲ್ಲಾ ಅಂಶಗಳು ವೈರಲ್ ವೀಡಿಯೋದಲ್ಲಿ ಜೆರ್ಸಿಯಲ್ಲಿ ಕಂಡುಬರುವ ಅಂಶಗಳಿಗೆ ಹೊಂದಿಕೆಯಾಗುತ್ತವೆ.

ಫೇಸ್‌ಬುಕ್ ಪುಟದಿಂದ ಪೋಷ್ಟ್‌ಗಳ ಸ್ಕ್ರೀನ್‌ಶಾಟ್‌ಗಳು. (ಮೂಲ: ಫೇಸ್‌ಬುಕ್: Pachapada Arangadi/ಲಾಜಿಕಲಿ ಫ್ಯಾಕ್ಟ್ಸ್‌ನಿಂದ ಮಾರ್ಪಡಿಸಲಾಗಿದೆ)

ಜೆರ್ಸಿಯು ಹಿಂಭಾಗದಲ್ಲಿ ಕೇರಳದಲ್ಲಿ ಮಾತನಾಡುವ ಪ್ರಾಥಮಿಕ ಭಾಷೆಯಾದ ಮಲಯಾಳಂನಲ್ಲಿ ಪಠ್ಯವನ್ನು ಹೊಂದಿದೆ. ಮೊದಲ ಸಾಲು ಸ್ಥೂಲವಾಗಿ 'ಗ್ರೀನ್ ಗ್ರೂಪ್' ಅಥವಾ 'ಗ್ರೀನ್ ಆರ್ಮಿ' ಎಂದು ಅನುವಾದಿಸುತ್ತದೆ, ಆದರೆ ಎರಡನೇ ಸಾಲಿನಲ್ಲಿ ಕೇರಳದ ಕಾಸರಗೋಡಿನ ಪ್ರದೇಶವಾದ 'ಆರಂಗಡಿ' ಸ್ಥಳವನ್ನು ನಿರ್ದಿಷ್ಟಪಡಿಸುತ್ತದೆ. ಐಯುಎಂಎಲ್‌ ಧ್ವಜವನ್ನು ಜೆರ್ಸಿಯ ಮೇಲಿನ ಮಧ್ಯಭಾಗದಲ್ಲಿಯೂ ಕಾಣಬಹುದು.

ಫೇಸ್‌ಬುಕ್ ಪುಟದಿಂದ ಪೋಷ್ಟ್‌ಗಳ ಸ್ಕ್ರೀನ್‌ಶಾಟ್‌ಗಳು. (ಮೂಲ: ಫೇಸ್‌ಬುಕ್: Pachapada Arangadi/ಲಾಜಿಕಲಿ ಫ್ಯಾಕ್ಟ್ಸ್‌ನಿಂದ ಮಾರ್ಪಡಿಸಲಾಗಿದೆ)

ಐಯುಎಂಎಲ್‌ (IUML) ಏನು ಹೇಳಿದೆ?

ಮುಸ್ಲಿಂ ಲೀಗ್‌ನ ರಾಷ್ಟ್ರೀಯ ಪ್ರಧಾನ ಕಾರ್ಯದರ್ಶಿ ಮೊಹಮ್ಮದ್ ಅರ್ಷದ್, ಮುಸ್ಲಿಂ ಸ್ಟೂಡೆಂಟ್ಸ್ ಫೆಡರೇಶನ್, ಮುಸ್ಲಿಂ ಲೀಗ್ ಕಚೇರಿಯ ಹೊರಗಿನ ಜನರು ಪಾಕಿಸ್ತಾನಿ ಜೆರ್ಸಿಯನ್ನು ಧರಿಸಿಲ್ಲ ಎಂದು ಲಾಜಿಕಲಿ ಫ್ಯಾಕ್ಟ್ಸ್ ಗೆ ಖಚಿತಪಡಿಸಿದ್ದಾರೆ. ಪಾಕಿಸ್ತಾನದ ಧ್ವಜಕ್ಕಿಂತ ಸಂಪೂರ್ಣ ಭಿನ್ನವಾಗಿರುವ ಜೆರ್ಸಿಯಲ್ಲಿ ಮುಸ್ಲಿಂ ಲೀಗ್ ಲಾಂಛನ ಸ್ಪಷ್ಟವಾಗಿ ಕಾಣುತ್ತಿದೆ’ ಎಂದು ಅವರು ಹೇಳಿದ್ದಾರೆ.” ಸ್ವಯಂಸೇವಕರು ಐಯುಎಂಎಲ್‌ನ ನಾಯಕ ಸೈಯದ್ ಮುಹಮ್ಮದ್ ಅಲಿ ಶಿಹಾಬ್ ತಂಗಲ್ ಅವರನ್ನು ಶ್ಲಾಘಿಸುವ ಹಾಡನ್ನು ಹಾಡುತ್ತಿದ್ದಾರೆ ಎಂದು ಅವರು ಹೇಳಿದರು.

ತೀರ್ಪು

ಕೇರಳದ ಐಯುಎಂಎಲ್ ಕಚೇರಿಯಲ್ಲಿ ನಡೆದ ಕಾರ್ಯಕ್ರಮವೊಂದರಲ್ಲಿ ಪಾಕಿಸ್ತಾನಿ ಕ್ರಿಕೆಟ್ ತಂಡದ ಜೆರ್ಸಿಯನ್ನು ಧರಿಸಿರುವ ಜನರನ್ನು ಚಿತ್ರಿಸಲಾಗಿದೆ ಎಂದು ಹೇಳುವ ಸಾಮಾಜಿಕ ಮಾಧ್ಯಮದಲ್ಲಿ ಹರಿದಾಡುತ್ತಿರುವ ವೈರಲ್ ವೀಡಿಯೋ ತಪ್ಪು. ಆರಂಗಡಿ ಮುಸ್ಲಿಂ ಯೂತ್ ಲೀಗ್‌ನ ಸ್ವಯಂಸೇವಕರಿಗಾಗಿ ಜೆರ್ಸಿಯನ್ನು ವಿನ್ಯಾಸಗೊಳಿಸಲಾಗಿದೆ.

(ಅನುವಾದಿಸಿದವರು: ರಜಿನಿ ಕೆ.ಜಿ)

Read this fact-check in English here.